الشاعر : محمد جارالله السهلي

[هواي الملتاع]

http://m-alsahli.com/images/sha3r.jpg

الاسم : محمد جارالله السهلي

ولادته ونشأته:

ولد الشاعر محمد جار الله السهلي في 1982.10.7
في دولة الكويت محافظة الاحمدي

تعليمه وثقافته:

حاصل على الإجازه الجامعيّه ( بكالريوس ) من جامعة الكويت - كلية العلوم
الإجتماعيه - قسم الجغرافيا - فبراير / 2006

هواياته:

أولى هواياته القراءة والشعر وحب الاطلاع

أعماله ومسؤولياته:

موظف في وزراة التربيه - الكويت - يناير / 2007

إلحالة الاجتماعية:

متزوج ولديه من الأبناء ( جارالله )

بداية مشوارة:

- بدأ كتابة الشعر عام 2001 و النشر عام 2002 من خلال مجلة آفاق
الجامعيّه ومحلق (الواحه) جريدة الأنباء وملحق ( ملتقى الشعراء ) جريدة الوطن .
- في عام 2002 تنبأ بنجوميّته الشاعر الإعلامي ( عبدالله الفلاح ) من خلال عدة
كتابات في واحة الانباء .
- في عام 2003 قدّمه الشاعر والصحفي الكبير ( بدر الحمد ) بخط يده
من خلال مجلة الساعي .
- في عام 2004 بدأ النشر في مجلة المختلف بتقديم ودعم من مدير
تحرير مجلة المختلف الأستاذ : نايف الرشيدي

عضويات يشغلها:

* عضو ديوانية شعراء النبط الكويتيه
* عضو جمعية المعلمين الكويتيه

أمسياته الرسميّه:

- أمسية الجهراء بمناسبة تكريم مجلة المختلف للشاعر الكبير طلال السعيد - نوفبر / 2004
- أمسية مهرجان هلا فبراير - 2005
- أمسية مهرجان عنيزه - 2005
- أمسيه مهرجان بريدة - 2006
- أمسيه مهرجان الدوحه الثقافي - 2006
- أمسية ( ابو ظبي ) : تنظيم الاتحاد الوطني لطلبة الإمارات - 2006
- أمسية مهرجان أبها 2006
- أمسية ( باق في قلوبنا ) : تنظيم اتحاد طلبة الهيئه العامه للدراسات التطبيقيه - 2007
- أمسية مهرجان ( الوجهة الشرقية ) : الدمام - 2007
- أمسية مهرجان هلا فبراير - 2007
-الأمسية الشعرية الكبرى مملكة البحرين -2008
- أمسية ملتقى دبي السابع للشعر الشعبي- 2008
- أمسية مهرجان هلا فبراير - 2008
- أمسية نادي الهلال السعودي : الرياض - 2008
- أمسية لندن : لندن - 2008
- أمسية مهرجان أهل القصيد الرابع : الكويت - 2008
- أمسية محافظة الأحمدي : الكويت - 2009
- أمسية شركة النفط الكويتيه : الكويت - 2009
- أمسية مهرجان الشعر الدولي الأول: دبي - 2009

لقاءاته تلفزيونية:

- برنامج جواهر : تلفزيون دبي
- برنامج احلى الكلام :قناة المختلف
- برنامج عذب المعاني : سما دبي
- برنامج سهرة مع شاعر : قناة الصحراء
- برنامج في حياتي : قناة المختف
- برنامج رواسي : قناة سكوب
- برنامج المجلس : سما دبي
- برنامج يا هلا : قناة روتنا
- برنامج حلو الكلام : تلفزيون مملكة البحرين
- برنامج الغبقه: تلفزيون دولة الكويت
- برنامج على الوتر:تلفزيون البحرين / قناة سكوب
- برنامج بحور القوافي: تلفزيون دولة قطر
- برنامج رواسي الشعر: قناة سكوب
* شارك بالعديد من البرامج الاذاعيه خليجيا

اصداراته الشعريّه:

- ديوان مقروء ( أصعب سؤال ) - 2006
- ديوان صوتي ( مختلف ) - 2007


والان مع قصائد الشاعر :







البارحه من حزنهـا ضاقـت جماهيـر الهـلال
وانا على شان الهلال اشعر من البـارح بضيـق
شاعر ولا ادري ليه ماجاله على شعـري مجـال
وانا اعشقه عشق الملوك لخدمـة البيـت العتيـق
اشجعـه مـن قبـل لبسـي للعمامـه والعقـال
ويصير شعري عقد من لولـو وياقـوت وعقيـق
بـدت علاقتنـا مـن ايـام الغـزو والاحتـلال
يعني هو : أول حب واول تجربـة واول رفيـق
اجامل احيانـاْ لكـن اليـا اشغلونـي بالجـدال
ابـلا تـردد اتمـادى عشـق واولـع حـريـق
اعلن (( هلاليتي )) واماريبه على روس الطوال
من قمة الضلع المويـق لقمـة الضلـع المويـق
مع احترامي للجميع من الجنـوب إلـى الشمـال
يبقى زعيم الأنديـه والمجـد والصيـت العريـق
ماكنه الا ابداعي بقصيدتي (( أصعب سـؤال ))
من بحرها لأفكارها لإحساسها العـذب الرقيـق
سـؤال لايمكـن يحلونـه ولـو طـال المطـال
لـو يحذفـون اجابتيـن ويستعينـون بصـديـق
كن المحال يمـر موسـم فيـه ماحقـق محـال
و هذا هو اللي صعب نرضابـه وفينـا مايليـق
ياليلـه الجمعـه تغيرتـي عـن كـل اللـيـال
فيك السعاده مـرت وتاهـت وظـل بهالطريـق
بين الضياع وصدمه الموقف وحسـرة وانفعـال
وصدر يضيق به الزفيـر اليـا تقفـاه الشهيـق
اغتيلـت الفرحـة عبـث باللخبطـة والاختـلال
كنها المحيط اليا انتحر موجه على جال المضيـق
ومن قال لي وشلون والآ كيف صار الاغتيـال ؟
اقوله وانا ابتسم مـن شـدة الحـزن العميـق :
جانا (( بكيتا )) من فشـل أبوظبـي والمونديـال
واللي محطم منتخب سهلـة يحطـم لـه فريـق
وانا اقسم بالله مافينـي علـى الصبـر احتمـال
بارد على عد الأمانـي وارتـوي وابـل ريـق
يـادوي اتجـرد مـن الواقـع واسافـر للخيـال
ويادوي اغفى (( خمسة وعشرين عام )) وثم افيق
ويصير ذاك اليوم لامـن فقـت رئيـس الهـلال
(( راشد بن عبدالعزيز )) المجد والفعل الطليـق
وانا اشهد ان لامن ترأس مجلسه نسـل الرجـال
صار الهلال بوقتهـا فريـق عـن ميـه فريـق





. ( . الزعيم . ) .




* .







أي والله انـي ضايـق ومرهـق ومخنـوق وحزيـن
وإما بمـوت مـن الولـه ولا بمـوت مـن القهـر ..
واللـي لعـب فـي حسبـة ايامـي وخلاّهـا سنيـن
إني على ذا الحال يا شعري لي اكثـر مـن شهـر !!
بعت ( المدينه ) لجل ( عين ) وقالـوا الخافـي يبيـن
ودفنتك ( بجوفي ) وقالـوا وش بقابـك مـا ظهـر ؟!
يا مطوّل الغيبه يا طـول الشـوق .. ميـر الله يعيـن
العاشق اللي عـاش ظامـي بيـن عـدّك والنهـر .!
عيّدبـي غيابـك ( سنـه ) والليلـه مـن العايـديـن
ولا عاد عيدك يا الجروح اللي بقلبـي مـن دهـر ..
يا صاحبي لو تعتـذر عـن غيبتـك عـذرك سميـن
حبك بعد ما غبت عـن عينـي تمـادى وازدهـر ..
من يوم شفتك ( والنعاس ) بعينك النجـلا ( سجيـن )
ومن نفس ذاك اليوم و عيوني ( سجينـه للسهـر ) !!
علقتنـي بالضحكـه اللـي تسـبـق .. الغمازتـيـن
وتركت لي شاعر !! كتب فيك القصايـد واشتهـر ..
سيّلـت دمعـك واستبـاح الدمـع ستـر الياسمـيـن
وعلمتنـي كيـف النـدى يجمّـل خـدود الزهـر !!
ليتك عقـب مـا غبـت غيّبـت اشتياقـي والحنيـن
أو ليتني ما قد دفعـت احـلام عمـري لـك مهـر ..
وياصاحبي .. لاعاد تسألنـي عـن الحـزن الدفيـن
أقسى الطعون : ( الطعنه اللي من حبيب و فالظهر ) !!





. ( . الياسمين . ) .




* .












ليّـن العـود مـال وميّـل ظـلالـه
وايق بصـدر شاعـره وقفـل بيتـه
فـوق قلبـي تركيمـنـاه وشمـالـه
واسبـل الدمـع وابكانـي وبكيـتـه
كنه يقول : شـي ٍرحـت مـا قالـه
وكني اقول: لا توّصيـه وصيتـه !!
وان تنهت مـن الفرقـا علـى فالـه
كنها: رماااح فـي صـدري تناهيتـه
قلت له : والظروف اقوى من آمالـه
اعتبـر حبّنـا موقـف وعديتـه !!
عيش دنياك وانسـى الحـب وهبالـه
وانـا بنسـاك !! وازعلتـه وخليتـه
عندي اني : اليـا ضايقتـه اشوالـه
وعنـده انـي : تنكـرت وتناسينـه
ويعلـم الله .. مانـي سالـي ودالـه
ماخبـر يـوم مـرّ .. ولاتمنيـتـه
احلم فيه .. واصحى .. وتهيـى لـه
كـم تخيّلتـه وزانـي وناديـتـه ؟!
مايس القد صالبني علـى اطلالـه !!
مـن تركتـه مكانـي مـا تعديـتـه
ما اقدر انساه وانسى ( وفرة خصاله )
اقسـم بربـي اغليـتـه وحبيـتـه
مـن تقهـواه عشـق وهـز فنجالـه
جعله يمـوت قبـل يشـوف ذريتـه
والله انـي حزيـن وحالتـي حالـه
كـل مـا يُمكـن اسويـه سويتـه !!
ليتني اقدر اعرف وشهي احوالـه ؟؟
ولا عن حالتي عقبـه درى ليتـه !!
وليتني كـل مـا مريـت فـي بالـه
ادري انـي علـى بالـه ومرتـيـه
يكفى احساسي بوصله عـن وصالـه
بشعر بجيّتيه لـو كـان مـا جيتـه
وليتنـي قبـل مـا اخليـه بلحـالـه
بسـت راسـه وودعتـه وخليتـه !!





. ( . لين العود . ) .



* .








الحب .. طفل ٍ سكن شعري وهوجاسي
وفي ظلوعي العـوج ربيتـه وكبّرتـه
خذاني من .. الوطن والناس وانعاسي
وابـلا قناعـه .. تقبّلتـه و برّرتـه
سلمت أمري إليه وطحـت متواسـي
إلين ماصار شـي ٍ مـا تصوّرتـه !!
حبيبتي .. كيف اكذّب حزني وياسـي
لو العذر يعـذرك قبلـك تعذّرتـه !!
الله يسامحك .. ما قدّرتـي احساسـي
وانا على شانك .. الاحسـاس قدّرتـه
نسّاني الهم .. غالي ربعـي وناسـي
وذكرت ربي .. وقلبي فيـك ذكّرتـه
ودوّرتي اسهل طريق .. لضيقة انفاسي
ماكن درب الفرح .. لرضاك دوّرتـه
يا سيّـدة خافقـي ومحطمّـة باسـي
كـم مـرة ٍ لمـت خفّاقـك وحذّرتـه
صحيح احبك .. وآخاف فراقك القاسي
وخطاك .. يامـا تجاهلتـه ومرّرتـه
لكنّـي اليـوم لا ذاكـر ولا نـاسـي
ودّعتك الله .. وقلبي عنـك صبّرتـه
عساني الموت .. كان بينحني راسـي
ويا جعلي الضيم .. لو مبداي غيّرتـه






. ( . عساني الموت . ) .



* .








إستريـح شـويّ .. واسمعنـي ثوانـي
بعدها مسموح .. قول اللـي تقولـه ..
جيت لك والقلـب ماهـو بالمحانـي !
شف قبل لوصلك سابقنـي وصولـه !!
ووالله ان لو لا الغلا مـا جـاك عانـي
يا بعـد منهـم بكولـه و ضحكولـه ..
عاشقك سـوّاح !! وعيونـك موانـي :
اخذني ّ .. من الحزينه .. للخجولـه !!
أبتسم خلنـي افضفـض لـك عشانـي
الحكي غصن ٍ عجز صوتي يطولـه ..
تعقد احجاجك وتعقـد لـي لسانـي !!
المطر يـا غيـم ضميّـان لهطولـه !!
خاطري مكسـور مـن قسـوة زمانـي
وانت ( كنْك إياااه ) وفعولك فعولـه !!
تعتبرني .. شخـص مغـرور وأنانـي
واعتبرك .. الكون في عرضه وطوله ..
آآه لـوّ تحـسّ بـجـروح الأمـانـي
كان ما تزعـل علـي ّ بهالسهولـه !!
حط ( عمرك ) يابعد ( عمري ) مكاني
وان لقيت قصور ؟؟ قول اللي تقولـه ..
وأنتبـه يـا سيّـد الغـيـد الغـوانـي
التشّـره والمعاتـب لـه أصـولـه ..
لا تساومـنـي ولا تـجـرح كيـانـي
كل شـي ّ إلا ّ الكرامـه والرجولـه !!





. ( . جروح الأماني . ) .




* .









ألا انت سولف لي عن احوالك وخل عنك القصيـد
يعني وش اللي في غيابـك راح اقولـه واكتبـه ؟
شعري .. على حطة يدك !! في غيبتك ما من جديد
البيت من قبل اكتبـه .. افكـر انـي اشطبـه !!!
دامـك تعـرف ان الشعـر لا يقنعـك ولا يفـيـد
استوعب حضوري ! وهـو انسـآآه لا تستوعبـه!
ركـز معـي .. الله يرضالـي عليـك ولا تزيـد
الهـم هـم .. وعدّنـي ضيـف ٍ نويـت توّجبـه
ما ابيك من بعد الجفـا ترجـع لـي بقلـب ٍ بليـد
حسسني بشوقك ! ودمعك مـن عيونـك اسكبـه !
ضيّعني بشهقة بكاك .. وجيب فيني ألـف عيـد !!
بحكيّـك اللـي حافظـه ولا عرفـت ترتـبـه !!
هـي كلهـا هالساعتيـن وعقبهـا ببقـى وحيـد
لا تشح بشعورك علي ّ ولا اتمـادى !! وانتبـه :
لا شفتني سجيت ( عنك / فيك ) جوّدني من ( إيـد
قلبـي ) ووصلنـي لقلبـك برضـاه او اغصبـه
هذه سنه ! ان ما سكنت القلب ! مسكنك الوريـد !
ونفس السنه مرت ! وحقي فيـك ضايـع واطلبـه
يـا آدمـي مـدام نظراتـك باحاسيسـي تشييـد
لا تترك ( اسألتي ) تموت ولا لقت بك ( أجوبـه )
ليه انت راضي بالعناد ؟ وبالرضى تصبح عنيـد ؟
ليه اتساهل بالجفـا ؟ ليـه الوصـل تستصعبـه ؟
وليه اتمنى الموت في بعدك واحـس انـه بعيـد ؟
وليه اشعر ان الموت في لحظة وصولك ما اقربه ؟
وليه اعتبر نفسي إذا ذبحني شوقـي لـك شهيـد ؟
ولا انت حتى الشوق لا ردك علـيّ تستغربـه !!
جاوب وريحني !! أو انسى كل شي .. ولا تعيد :
سؤالك عن شعر ٍ شطبته مـن قبـل لا أكتبـه !!






. ( . كلها ساعتين . ) .



* .










الفكر ضد المـوت فـي كـل الاوقـات
و اللـي بليّـا فكـر عايـش بتابـوت
الصـح منـه يـدوم ويخلـد أمــوات
والاّ الغلـط مجـرد سنيـن ويـمـوت
والشعر لوما صار ( ساعي قناعـات )
يصبح حكي .. لكن على هيئة بيوت !!
والصـدق مفتـاح الكرامـة ومنـجـاة
يكسيك من لبس الثنـاء مشلـح وكـوت
والكذب نقص عقول وفعـول واثبـات :
بان أغلـب الياقـوت ماهـو بياقـوت
والحب ( أحلى شي ) .. إلاّ مع الـذات
والدار ( أغلى شي ) .. إلاّ بـلا قـوت
والدين .. عز .. وهيمنة .. وانتصارات
لا صار فعل وقـول وإجهـاد وقنـوت
يوم المشايخ .. قبل عصـر الدويـلات
تنقل كفن وسـلاح ماتنقـل بشـوت !!
في وقتها ياهـل الخطـب والشعـارات
سالت دموع العز من ( عين جالوت ) !!
وفـي وقتنـا .. ياصانعيـن القـرارات
نضحّي بغزة علـى شـان بيـروت !!
والفرق شاسع .. ياصراع الحضـارات
والقول أكيـد .. وبالأدلـة .. ومثبـوت
الماضي: أمجـاد وشمـوخ وفتوحـات
و الحاضر: مهايط ومقهـى وبيلـوت !!
وأمـرّ وآدهـى .. ماهـو قــادم وآت
لاصـار واقعنـا مبـهـذل وممـقـوت
يمثـل الأمـة فـي الامـة عصابـات
وعلى خراب بيـوت تتعمـر بيـوت !!
جلسات سريّـة علـى شـان جلسـات
تفوّت اللـي مستحيـل انـه يفـوت !!
واللعب واضح فـي جميـع المجـالات
بتشوت ؟! صلح لي أصلح لك اتشوت !!
والخيـر بيّـن فـي وجيـه البشـوات
والشعـب مستهلـك ومتعـب ومكبـوت
حرية الراي : اختصـاص القيـادات !!
وحنا تخصص ذل وانصات وسكـوت !
ياصاحبي .. خل القصـص والحكايـات
وش ميزة التوت ؟ ان فقد لذة التـوت ؟!
إن مت ! من قول الحقايق .. سهـالات
على الأقل تدري على ويـش بتمـوت !
والمشكله ماهيب فـي كثـر الاصـوات
المشكله لاصار مـال العقـل صـوت !






. ( . صوت الأمة . ) .




* .










فـن الكـلام الفاخـر الجـذّابـي
أوّلـى بقلبـي والقصيـد أوّلابـي
لكـن مـع ذلـك نسيتـه كـلـه
تحتاج روحي عزلـة المحرابـي
أهـذّب النفـسَ بشـئ ٍ منـهـا
فالقلب رجلي والرضـا مرقابـي
ومدام روحـي راضيـه مرضيّـه
لـو ان مافينـي قـدم ترقـابـي
علـى كفـوف الغيمـه الممتـدّه
والريح تلعب فـي كمـوم ثيابـي
كن السعاده وانشراحـة صـدري
تشرّعـت لهـا جميـع ابـوابـي
يسبح خيالـي فـي بدايـع ربـي
مستسلمـا ً .. للمنظـر الخلاّبـي
متجليـا ً .. عـن الحيـاه الدنيـا
متناسياً .. همي وشـد اعصابـي
مانيـب يّـم الساحـه الشعبـيّـه
لين احتدانـي للقصيـد أعرابـي
كائن غريـب ومرحلـة تكوينـه
مـن البدايـه : كومتيـن ترابـي
تكوّنـت وآلتحـمـت وامـتـدّت
ولبست لها مثـل البشـر جلبابـي
واستشعرت فـي مطلـع الألفيـه
ست اسنوات بلا وجـود إيجابـي
واليا متى ؟ يا ( كومتين ) الدجّـه
من شعر غيرك تختلـس وترابـي
اسمع كلامـي وافهمـه واعتبـره
ماهوب كل مره يجيـك اخطابـي
يحوّل الفصل الدراسـي فوضـى
تواضـع الإسـتـاذ للطـلابـي
( ليس الغبـيُ سيـداً فـي قومـه
لكـنّ سيـد قومـه المتغـابـي )
لاتعتبـر نفسـك زعيـم الثـوره
وانته مجـرد سـارق ومتحابـي
ولاصار لامني حضـرت ألغيتـك
ماهمّـنـي تـواجـدك بغيـابـي
ريّح ملايكتـك وشـوف امـورك
ولاّ تـراك بتنتـحـر بأسبـابـي
انا القصيد اللـي تجيـك أخبـاره
الشامـخ المتغطـرس الإرهابـي
روس ٍ يذرّيـهـا ذرى وقفـاتـه
وروس ٍ مضرّيها على المشعابـي
نسّاك نفسك وأشغلـك فـي همّـي
وخـلاك لا بـنّـي ولا عنـابـي
في كل ديـره صورتـي قدامـك
تجبرك يوميـا ً تحسـب حسابـي
و والله لا اموت ولا حسبت حسابك
لو ان بيتك عنـد روس أطنابـي
لاني عرفت ان قيمتي في عينـك
همشتها مـن شـدّة الإعجابـي !
الحاصل .. ان الشايب اللي جابك
يا طيب راسه لـو قعـد عزابـي






. ( . الأرهابي . ) .




* .










يقـول المحبـه ويـش لوغابـوا الاحبـاب ؟
اقول الجسد..من غير نبـض وشعـور وروح
يقول النهار يغيـب ! وش موقفـك لاغـاب ؟
اقول ان رضيت اسكت..يصير السكوت..البوح
يقول الستر..سمعه وذكـر وفعـل وثيـاب !
اقول المحب مـن الولـه والسهـر مفضـوح
يقول انت قايل لي بسافـر بـدون عتـاب ؟!
اقول ايه ! قبل اضيع في وجهـك المملـوح !
قبـل تبـدي الاعجـاب وابادلـك الاعجـاب
قبل..تاخذ احساسي وقلبـي عبـث وتـروح
قبل .. ينفتح لك بيـن عـوج الحنايـا بـاب
ويبقى على طاريـك طـول العمـر مفتـوح
قبل .. لاتوهق فيـك يالصـادق .. الكـذاب
قبل..لاتحطم منـك يالمخطـى .. المسمـوح
قبـل .. لاتعلقنـي وترحـل بـدون اسبـاب
قبل .. لا تعلمنـي اعـد السنيـن جـروح !
قبل .. يتبعك وانت تمـادى جفـا وغيـاب :
قصيدي ودمع عيونـي وصوتـي المبحـوح !
ياليت الزمن يرجع واحسب لجفـاك حسـاب
وعد .. ماتعلق فيك وانساك .. قبـل تـروح





. ( . بسافر . ) .



* .








احضّـرك واتلـوا عليـك البسملـه
و الفاتحـه والغاشيـه والزلـزلـه
واعلّمـك وش الحديـث المنطقـي
من شان تعرف كل شـي ٍ تجهلـه
خدمه .. بقدمها بـلا شـرط وثمـن
يا صاحب آفـاق الخيـال الممحلـه
وماهيب من بـاب المـوّده والغـلا
لكّن من بـاب احتـواء البلبلـه !!
كنت احسب ان سود الليالي ربّتـك
واثرك على نفـس العلـوم الاولـه
موّسـوس وحالتـك حالـه مزريـه
الحلـم قدامـك وعاجـز تاصـلـه
على مدار العام مـن قـل الثقـه :
بينك وبين الشـك والريبـه صلـه
ذكائك المزعوم حاجـه مؤسفـه !!
تضحك علـى تفكيـرك وتستغفلـه
سويت نفسك فاهم الوضـع وذكـي
وكليتها يا بـو الشبـاب مفلفلـه !!
ما احد ٍ جبرك تضيع وسط المعمعه
وتستصعب الموقـف ولا تستسهلـه
القصد واضـح والمعانـي واضحـه
ليه اتمادى فـي الحكـي وتؤّلـه ؟
طويق ثابت والجبـل يبقـى جبـل
فلنعتبـر هــذا ســؤال وعلله ؟!
شفت ان مالك بالثقـه موطـأ قـدم
كـب الغـرور المفتعـل ولاّ اقتلـه
وان عوّدت نهـج وقناعـات وفكـر
الاجوبه ترضـي غـرور الاسألـه
المرجله لا صارت هايـط وشعـر
مـا عـاد ابيهـا لعنبوهـا مرجلـه
وان كانهـا مواقـف وقـول وفعـل
ماعندي الا : تـم وابشـر وازهلـه
خذ لك نصيحه كانت تسـام بجمـل
يا مسيلمه او بالاصح يا عبهلـه !!
لا عاد تخطب في شبـاب المجتمـع
ريّح .. وخل الدين والنصـح لهلـه
ولا عاد تشهد زور فارجـاء البلـد
وتبقى كذا مـن مرحلـه لا مرحلـه
حتى ابليس بيستحي من كذبتـك !!
من كبرها ما هيب من ضمن عملـه
واليا بغيـت الجـد سجّـل مايلـي
واستحملـه واستوعـبـه واتقبـلـه
ماهوب عيب انـك تغيّـر منهجـك
العيـب وانـواع الخطـا والمهزلـه
انـك تجـي كلـك وتستنقـد فئـه
على فعل وانت اول اللـي يفعلـه !!
راجـع حساباتـك وفكّـر واتعـض
واضرب على نفسك جميع الامثلـه
ان كان ما انت بكلهـا مثَـل مثَـل
مـاوالله اقـول الشعـر واسترسلـه
خلاصة الموضوع كله ( من - إلى )
بيت ٍ يوضح لك غموض المسألـه :
أنا .. لو اني مـا لعبـت بحسبتـك
ما كان يسبب لك قصيدي مشكله !!






. ( . المسألة . ) .




* .















لا يطـوّل سكوتـك ولا يطـوّل سكـاتـي
تـرى الـدعـاوي بسيـطـه لا تكبّـرهـا
خلـك علـى خبـري وظنـي وهقـواتـي
خابرنـي الضيـق والضيقـات خابـرهـا
وسّـع لـي البـال يـا سيّـد طموحـاتـي
ولا تغيّـر النظـره اللـي كنـت تنظرهـا
تقول : حـب البشـر طـوّق مساراتـي ؟
ابـك انـت حبـك مساراتـي يسيّرهـا !!
ان غبـت عانـت عيونـي مـن معاناتـي
وذكـرك يصبّرنـي وطيـفـك يصبّـرهـا
لا يـا بعـد شهرتـي واعظـم نجاحاتـي
وكل القصايد مـن ابسطهـا ليـا اشهرهـا
ولا يـا بعـد مـن يـدوّر لانكسـاراتـي
شعّار سبب وجـودي ضيـق خاطرهـا !!
انت اجمـل اللـي تسجـل فـي سجلاتـي
ان جيت : وين البشر ؟ وان رحت : مكثرها
يـا اوّل وآخـر قصيـدي وآروّع ابيـاتـي
محـدٍ يحـب القصايـد كثـر شاعرهـا !!
مـا فـاق حبـي لـك الا حبـي لـذاتـي
يعنـي احبـك محبّـه مــا اتصـوّرهـا
يا اصدق من النشـوه اللـي فـي بداياتـي
لا قلت لي كـم بيـت .. وقالـوا انشرهـا
واغلى مـن الدمعـه اللـي كـل صدماتـي
تطلـب يدييهـا !! واحجّرهـا ولا انثرهـا
وآحـن منـي علـيّ ان شفـت زلاّتــي
القـاك بررتهـا لـو صـعـب ابـررهـا
واطهـر حكايـة محبّـه فـي حكايـاتـي
مـن قبـل لا عيشهـا حسّيتـك اطهرهـا
لا تلومنـي لا بديـت آخــاف وآحـاتـي
كـل حاجـةٍ غاليـه مـا ودّي اخسـرهـا
ولا تضـايـق لـيـا كـثّـرت جيّـاتـي
ضيّعـت فيـك السنيـن وجيـت ادوّرهـا
تـعـال رتبـنـي ورتــب حسابـاتـي
او تدري شلـون ؟! رتبنـي و بعثرهـا !!
مو مشكلـه لـو تصيـر اطـوّل مسافاتـي
المشكلـه لابـديـت احـسّـك اقصـرهـا
اكبـر عيوبـي : بديتـك مـن نهايـاتـي
واكبر عيوبك : لقيـت اوّلـك بآخرهـا !!
يـا مكتشـف عالمـي واقـدم حضاراتـي
حـرام كسـر الخواطـر بيـد جابرهـا ؟!
مـدام تقـدر علـى اللـي فـوق قدراتـي
لا تذخـر الفزعـه اللـي قلـت ذاخـرهـا
رجعنـي لوقتـي او رجعـلـي اوقـاتـي
عاميـن تنطرنـي .. وعاميـن ناطـرهـا
وتقـبـل الــود والشـكـر وتحـيـاتـي
يـا ساكـن الـروح والـروح ومشاعرهـا
وروّق وركّـز وحـاول تفهـم الآتــي :
فكـره تـأكـد قلـيـل الـلـي يفكـرهـا
لـو ان غيـري معـاك يسـوي سـواتـي
قلت : انت نعمه وهـو عاجـز يقدّرهـا !!





. ( . شـاعرها . ) .




* .










يا نجـد شوفـك عيـد وزيارتـك عيـد
مـن بـد بـلـدان الخلـيـج ودولـهـا
وفيافـي الـعـارض تحلـيـك وتـزيـد
غـلاك عـنـد محـدثـك لا وصلـهـا
قولـي لهـا عنـي يـا دار الاجـاويـد
لاهــب غريبيـهـا وداعــب نفلـهـا
لا تحسبنـي فـدار اخـو مريـم بعـيـد
واهـي هنـا بيـن المحـانـي باهلـهـا
انــا سلـيـل معتقيـيـن المصافـيـد
اللـي حـووّا فيـك الإمــام وشملـهـا
تـوافـدوا للبيـعـه ابــلا مـواعـيـد
قبـل يراسلهـا لـفـت لــه رسلـهـا
مـن منطلـق ديـن وقناعـه وتوحـيـد
نفوسهـم كانـت علـى الـعـود ولـهـا
مـا بايـعـوا بحـصـار ولاّ بتهـديـد
الله عـلـى فـطـره سليـمـه جبلـهـا
كـنـا ولا زلـنـا الـدهـاه الاوالـيـد
قـوم اصطفاهـا ذو الجـلال وجعلـهـا
يمنـى معـزيّ لا صفـق حيـد ٍ بحيـد
دون الألـف والــلام ولــلام والـهـا
أفعالنـا تشـفـي كـبـود المضاهـيـد
لـو مـا أنخلقنـا ماوجـد مـن فعلـهـا
وفطاعـة آل سعـود صــم الجلامـيـد
نـسـاوي قممـهـا بــوادي سهلـهـا
وفطاعـة آل سعـود جـراهـد البـيـد
تنبـت فخـر مـن دمـنـا لا غسلـهـا
وفطاعـة آل سـعـود روس المقـاريـد
نجتثـهـا قــدام تـــدرك اجـلـهـا
حكامنـا والـنـا الفـخـر والتماجـيـد
ان فعلنـا الـسـم الـذحـاح لزعلـهـا
وحنـا لهـم فعـل وقصايـد واناشـيـد
واهـم لنـا معـنـى الحـيـاه وأملـهـا
وفشـاعـر الملـيـون نهـايـة المـيـد
لرضاهـم حصـان العـوامـر كفلـهـا
الشاهـق المطنـوخ سـقـم الحواسـيـد
فـكـره يعريّـهـا ويكـشـف جهلـهـا
فيـا اللـي تـزّود فالسواليـف وتعـيـد
دعـايـة الصنـوبـري مــن قبلـهـا
بدعـه ولا يذكـر ورى المبتـدع فـيـد
واغبـى مـن اللـي قالهـا مـن نقلهـا
نقـد ٍ بـلا معنـى حصيـلـه مناقـيـد
مـا يقـنـع الا روس جـوفـا وبلـهـا
وان كـان تبغـى راي وافـي وتأكـيـد
لا جيـت عـقّـال الرياجـيـل سلـهـا
والله مـا تبـحـل ولا يمـكـن تحـيـد
بتـقـول مــال الحمـلـه إلا جملـهـا
والحملـه اللـي بركّـت كـل صنـديـد
فرعونـا ( نـاصـر ) يـقـوم بدبلـهـا
شاعـر علـم : حنكـه وجـرأه وتجديـد
ينـزل قفـار ٍ مـاحـد ٍ قــد نزلـهـا
فكـر وشعـر ناهـي وراهـي مواريـد
وان مالـت الدنـيـا بفعـلـه عدلـهـا
فرقه عـن اقارنـه ومـن غيـر تعقيـد
قصـه ابشرحهـا وابـضـرب مثلـهـا
مطامـع الشعّـار فـي نــدّر الصـيـد
تحثهـم علـى السعـي فــي سبلـهـا
تقنـص لـهـا بسهومـهـا والبـواريـد
وهـذا رمـى هــذي وهــذا نبلـهـا
متزاحميـن وصيدهـم دايــم زهـيـد
والنـادره تـشـرد ولا احــد ٍ قتلـهـا
ومن خلفهم ( ناصر ) على حصان ابو زيد
واليـا شـرد منهـن عصـيّـه ختلـهـا
ولا هـي غريبـه يـا حفيـد الاماجيـد
لا شقـت مـن عيـا عليـهـا خجلـهـا
الكايـده بنـت الفـخـر قبـلـة الغـيـد
طرقـا ً زهـى منظـر جسـدهـا حللها
وانّـا معـك دعـم ومـواقـف وتأيـيـد
حتـى يبيّـن جـدهـا مــن هزلـهـا
وان شحـت فيـاض الزمـن بالعناقـيـد
عــادي يكفيـنـا جنيـنـا نخـلـهـا
وخلاصـة الموضـوع والشـي الاكـيـد
جمله و مـن قبلـي ( فـلاح ) ارتجلهـا
مـن غيـر قاصـر فالرجـال الصناديـد
( حنـا معازيـب القصايـد واهلـهـا )






. ( . الدهاة . ) .




* .









( اصعب سؤال ) اللي جوابه للأسف مثله ( سؤال ) !!
ما هو تفلسف !! الا موقف صار واسمع " ثاني بيت" :
البارحه يومه سأل : ( وش ذكـرك ذيـك الليـال ؟ )
كان الجواب بكل بساطه : ( من متى اصلا نسيت ؟ )
ادري بان جمع ( الصعوبه والبساطه ) شي محـال !!
لكنها صارت كذا ! واللي (( اهـم )) انـي دريـت :
ان الحيـاه فبعـد احبـابـك اذا جــف الـوصـال
اتعيشها لو تقتنع انك خـلااص اصبحـت ( ميـت !!)
يا صاحبـي لـو كـل شـي يمـر بالخاطـر يقـال
مـا كانـت العبـره تولجنـي اليامنـك طـريـت ؟!
شفني قدرت احبس دموعي بس ( دمع القاف ) سـال
ويا كبرها ساكت ولكـن داخـل اوراقـي بكيـت !!
عمر الحكي ما كـان دافـي لاابتـدى بقولـة تعـال
لجل اتجاهـل رجفـة حروفـي اليامنـي حكيـت ..
الحـال فـي بعـدك قسـم بالله مـا اسميـه حــال
انوي على الضحكه واحس كلي خطا لانـي نويـت ؟!
اتصور انك مـن رحلـت اشوفـك لجسمـي ظـلال
لا شفته امشي ببتعد واثـره معـي مهمـا مشيـت !!
مـدام يعنـي فـي بحـرك لفرحتـي مليـون جـال
وش فيه موجك ما ركد ؟ قربت اموووت وما رسيت ..
يرضيك ما عـادت معـي تفـرق اذا جالـك مجـال
لاني اقتنعت انك نهايه وانـي ببطـي مـا بديـت !!
صرت ( اعقد حجاجي ) اذا جابوك باطراف الجـدال
وانا قبل لاقالوا اسمـك كنـي : ميـت ثـم حييـت!؟
تعبـت اعيـش الـدور وافتـح للمعاذيـر الخـيـال
واتخيل انـي جيـت فـي بالـك وبانـك استحيـت!!
وتردلي كلك (( وله )) وتقول : ( كن البعد طـال ؟ )
ومن الفرح ما عاتبك واقول : ( ياخـي مابغيـت !! )
حتى وانـا تخيـل حشمتـك ! لـن قلبـي لا يـزال
يكرر اسمـك داخـل اعماقـي بنبضـه لا سهيـت..
قلي شسوي فيـك ؟ وانـت بداخلـي اصـدق مثـال
للحب واحساس القصيد ان عانـق الليـل وسريـت..
ربـي يصبرنـي علـى الفرقـا مـدام الحـظ مـال
وانت بيجيلك يوم تعرف ليـه فـي بعـدك شكيـت !!
واذا بـلاك الله وعذبـك اشتياقـك (( بـس تعـال ))
واقرى القصايد في غيابـك كلبوهـا بيـت ... بيـت
بتدرى ان ( اصعب سؤال ) اللي يجي رده ( سـؤال )
لا قلتلي ( وش ذكرك ؟ ) ثم قلتلك ( متى نسيـت ؟ )






. ( . أصعب سؤال . ) .




* .










تـعـال اغنيـلـك الـمـوال وغيـابـك
للشـوق ( بحـه ) تميـز نبـرة اشعـاري
زهبـت عـذري وردي لاابتـدى عتابـك
كم لي افكـر شقـول ان قلـت شالطـاري
بقـول مشتـاق للطعنـه مــن اهـدابـك
ومشتـاق اكثـر لقولـة باخـذ بثـاري !!
وبقـول مليـت مـدري ملـنـي بـابـك
من غبت دونه وقـف عمـري ومشـواري
مغير اسولف لـه اللـي صـار باسبابـك
وارمـي عليـه الشقـا والهـم واعـذاري
من غير لا ادري اجي وان قال وش جابك ؟
قمت اتساقط علي مـن ( غيمـة افكـاري)
ليـن اتبلـل (( ولـه )) واطيـر اسرابـك
وتـروى عصافيـر فرقانـا مـن انهـاري
وارد ميـت عـطـش واقـلـب كتـابـك
واقرى حكايـة سـراب ٍ عـذب ازهـاري
شفنـي ذبلـت وطفيـت وجيـت ابحيابـك
عمـري دفعتـه ثمـن دربـي ومسيـاري
امـا تخلينـي احـيـا فـيـك وابقـابـك
ولا تـاكـد وفـاتـي آخــر اخـبـاري
ابك انت مـره طرالـي احـرق اعصابـك
طاوعت فكري عليك وجيـت لـك سـاري
فكـرت ابيعـك وابعثـر بالمـدى اطيابـك
عقلي نواها وقلبـي قـال انـا ( شـاري )
ورديت احسك بصدري واحسـب احسابـك
انـي زرعتـك لقـا وابقطـف اثـمـاري
والـيـوم دام المـسـا تــوه تغـنـابـك
اقـررب مدامـك لحـن تشتاقـه اوتـاري
ابعـزفـك للقصـيـد الـلـي تسمـابـك
وشب لـك داخـل بحـور الشعـر نـاري
واسمعـك مـا كتبتـه لـيـن ( ينتـابـك
غرور ) واسمـع كـلام ٍ عـده اجبـاري
لاصـرت انـا والقلـم والدفتـر احبابـك
يحـق لـك لـو تقـول ان الشعـر داري
ما قلتهـا قصـدي انـي اكسـب اعجابـك
لكنـي بـهـذي ادري ويــش مـقـداري
الصعب جـذاب وانـت الصعـب يزهابـك
وانا علـى الكايـده يـا عاشقـي ضـاري
وان جات للجـد لـه لـذه تـرى غيابـك
شف ( بحة الشوق ) كيف تميز اشعاري ؟؟






. ( . بحة الشوق . ) .




* .












ماتباطـيـت القصـيـد !! إلا تباطيـتـك
والشعر في جيتـك شكـل وطعـم ثانـي
عانك اقبلت ولمحتـك فـي شطـر بيتـك
( فكره مجنونه تسلـى بضيقـة اوزانـي )
يا أعذب أحسـاس ملكنـي علـك وليتـك
تفهم الشعـر ان شربـك بصحـة لسانـي
يعلـم الله فـي غيابـك مــا تناسيـتـك
بس فـي مـره نويـت انسـاك ممدانـي
قلت:ابنسى_وارتفـع صـوتـك ولبيـتـك
واثـر خفاقـي بصوتـك عنـك نـادانـي
ويـش اسـوي دامنـي بالجـوف ربيتـك
طفل تسـوى هالحيـاه بعيـن: شريانـي
تلعب..وتكبر..وتكبـر.. لـيـن عديـتـك
بالغـلا (آخـر نمـاي) وكـل (شيبانـي)
والله ان عمـري بـدا مـن يـوم حبيتـك
واعرف انه ينتهـي لـو قلـت: تنسانـي
حط فـي بالـك أنـا مـن عـام خبيتـك
ان صحيت بخافقـي وان نمـت بأجفانـي
مابـي غيـري يلمحك_حتـى لا غنيتـك
غرت من صوت الصـدى لا ردد ألحانـي
من كثـر مـا أشتقـت لطيوفـك تمنيتـك
رمش عيني أو تصيـر الشـوف لأعيانـي
وان تمـادى هالحنيـن بجفنـي ضميتـك
وقتها : ألقاك ..لكـن ليـه مـا ألقانـي؟؟
والله انـك مـن لفيـت بنبضـي حييتـك
وكني بقولـة (هـلا) بينـت حرمانـي. !
هـذا حالـي يالغـلا مـن يـوم خليتـك
وانت طمني علي فالبعـد وش جانـي . ؟
اذكـر انـي بالوفـا صغتـك وسميـتـك
واذكـر انـك بالوفـا كـنـت تحـدانـي
في كلاوصرت أشكـك مـك ليـن بكيتـك
وقلت: موعدنـا يجـي كـان الله أحيانـي
ويـوم جيـت بخافقـي وبخافقـك جيتـك
كنت انا رابح مـع انـي خاسـر رهانـي
والأكيـد انـي لقلبـي بـيـدي وديـتـك
وعاد شوف اليـوم ويـن الحـب ودانـي
ياعسانـي صـدق ولعـتـك و هميـتـك
و ياعسـاك بجـد تعشقـنـي وتهـوانـي
ولو تقـول انـي بغيابـي عنـك عنيتـك
أ نت همك صرت أعده (( حسبة أخواني ))





. ( . حسبة أخواني . ) .




* .











شوش يا راسي وغن ولا عليك مـن الملامـه
شاعرك لا شاشت هجوس الشعر هجرس وغنا
منت ضاري فالهوان وفالطمـان وفالرخامـه
ولا انت مطرق خيزران ان نسنس الغربي تثنا
انت ربي خالقـك للمجـد وزمـام الزعامـه
فيك من هيبة صلاح الدين وعـزوووم المثنـا
وان دعوك اهل المواقف والمكارم والشهامـه
هات من شرد البيوت اللي على العـز اتبنـا
ما على ماضيك زود ولا مثل هامتـك هامـه
يبصم الطيب عليهـا والـردي كانـه جهلنـا
علموه ليا وقف يجلس على فـراش الكرامـه
ويتريح مـن عنـاه وينشـد التاريـخ عنـا
ومحفـل الليلـه يجنبـه الضعيـف والهلامـه
والـردي لامـن تـردّى لا يحسبنـه شحنـا
يا سهول ويا سبيـع ويـا صواريـم القرامـه
الحميا كـان قاولـوا مـن لهـا بقـول حنـا
من قبل عصر الامام اللي بنى قصر اليمامـه
طبعنا في ماضي الازمان لا حاضـر زمنـا
صفنا واحـد ورايتنـا علـى راس العدامـه
ومن خرج عن وحدة الصف يهبا ماهوب منـا
يا بني عامر هل الطالات واصحاب الفخامـه
والسيوف اللي من ارقـاب المعاديـن اتحنـا
والله انّـا رايـة الاجـلال والمجـد وسنامـه
والله انّا فرحة اللـي مـن عنـا وقتـه زبنـا
والله انّا نصرة المظلوم مـن عقـب انهزامـه
والله انّـا ملجـأ الخايـف ومزبـان المجنـا
والله انّا فزعة المضيوم كان الوقـت ضامـه
ووالله انّـا والله انـا والله انــا والله انــا
لا بـة ٍ تحمـى مواقفهـا ليـا يـوم القيامـه
يشهد لنا ما نقـول ويشهـد لنـا مـا فعلنـا
ومن غدوا بني سهل وسبيع بالشـده حزامـه
طوقـوه عيـال عامـر بالسعـد منـا ومنـا
يا طلال ابشر بعزك وارق من فوق الغمامـه
انت املنـا فالسنيـن المقبلـه وامـل وطنـا
قالها من ينحت في صم الصفا اجـزل كلامـه
من قصر عن لازمك يا بو سعد ماهوب منـا






. ( . شوش يا راسي . ) .



* .











ياكثر مـا تنشـر وكالـه يقولـون
اللـي خبرهـا ميّـت وبثهـا حـي
مالا تحس قلـوب وتصـدق عيـون
علة نحر واخبارها غي فـي غـي
فياللي بحمـدان الفلاسـي تهـذرون
وتزوجونـه حصـه ونـوره ومـي
عني بلا يمكـن وتخميـن وظنـون
لاتعجبـه هـذي ولا تعجـبـه ذي
الشيخ مايقنـع ويرضـى بمـا دون
وجهٍ شرح للشمس وش يعني الضي
وحمدان في بنت المطاليـق مفتـون
يحبّها من عـاده صغيـر وصبـي
والادمـي باللـي يوازيـه مقـرون
من اجل ذلك يذكـر الشـي بالشـي
اخذوا خبر صادق موثق ومضمـون
لكل بيت وكـل حـاره وكـل حـي
تريحن في البيت يا احلى نساء الكون
ابوه قبل ايـام خاطـب لـه دبـي





. ( . أشـاعة دبي . ) .


* .













لا غشاك الليل واسرف بـك الحـزن العميـق
جنّـب وجيـه البشـر واسـجـد لخلاّقـهـا
ادخل بغيبوبـه مـن الهـدوء .. ولا تفيـق !!
وراود دموعـك علـى عينـهـا واحداقـهـا
خل روحك تدّرج !! من زفيـر اليـا شهيـق
دمعـة ٍ لحضورهـا .. دمـعـة ٍ لفراقـهـا
كـن دمعـك وقتهـا يغسلـك ويبـل ريـق :
وجه الارض !! وينتزع روحك مـن ارهاقهـا
رتّب انفاسك !! ودوّر علـى نفسـك طريـق
واستـرح بيـن الحنايـا وفــل ارواقـهـا
راجع ذنوبك على اقل من مهلـك .. وويـق :
شــوف وتفـقّـد معالـيـقـك وخفّـاقـهـا
الحزن : دافـع قـوي للرجـال .. ولا يعيـق
غيـر نـاس ٍ تخلـق وذلّهـا فاعناقـهـا !!
الشقيـق يدعّـم الـذل فـي اخـوه الشقـيـق
والبضايـع تختلـف باخـتـلاف اسواقـهـا
وانت حاضـرك يتفاخـر بماضيـك العريـق
شجـرة ٍ عجـز الزمـن لا يحـت اوراقهـا
كنْه شمس مـن الذهـب والجواهـر والعقيـق
كـل صبـح يلامـس المجـد نـور اشراقهـا
وكان عزمك ما رقـى قمـة الضلـع المويـق
ما انت لاقي ( عـز ) فـي جلالهـا ودقاقهـا
نوّخ ركابك .. وشكّـل مـن اشكالـك فريـق
الرخامـه فـي تزايـد عــدد عشّاقـهـا !!
الاسامي حمل !! واللي حمـل مـا لايطيـق :
شـاه ودك للصفـاه الضـحـى تستاقـهـا !!
العـرب مـا تبغـي الفخفخـه ولا البـريـق
تبغـي امطـار السحـب ماتـبـي برّاقـهـا
لا تحسب المرجلـه : زول ولسـان ٍ طليـق
الرجـال رجــال : بافعالـهـا واخلاقـهـا
افرد اجناحـك مـدام السمـا تبغـى عشيـق
اغتسـل مـن غيمهـا وفـج كبـد افاقهـا !!
خل اخوك الصبر !! واعجابك بنفسك صديق !!
واعتنـز بالله كفـيـل البـشـر وارزاقـهـا
لا تفكر في هـل الهـرج لـوّ شبّـوا حريـق
الـكـلاب مربّـطـه لا تـحـل وثاقـهـا !!
وكان صدرك من خباليـن خلـق الله يضيـق
والله ان تبطي ضلوعـك بضيـق خناقهـا !!
وان تغنيـت بشعـر فـي فعولـك مـا يليـق
نقّـع جـزال القصايـد وبــلّ اوراقـهـا !!
لا تكلف نفسك ( بزوبعـة جـال المضيـق )
( المحيطـات أربعـه ) والـدرّر باعماقـهـا
مادرى الشاطي عن الخوف بعيـون الغريـق
ولا لعب في حسبـة النـاس غيـر اشواقهـا
فان دعاك الشـوق للـورد وانفـاس الرحيـق
اذكـر اجمـل سيـدات التـرف واعناقـهـا
المهاه .. الفارع .. أسطورة الحـس الرقيـق
مـا ذبحـك الا غلاهـا وطـول فراقـهـا !!





. ( . أسمع يا محمد الجارالله . ) .



* .












يا الغايب اللي غابت سنينـي معـاك
يا جعل ما جاني من الفرقـا يجيـك
استغفر الله !! جعل ماجانـي فـداك
حتى لو ان نهايتي .. علـى يدييـك!
مسامحك .. واللي بقوله فـي قفـاك
خيرك كثير .. ويرحـم الله والديـك
ماصار شي ابلا رضاي الا رضـاك
اللي ماهو فيني وابيـه القـاه فيـك!
كنت السما في عيني وعيني سمـاك
كانـت حياتـي كلهـا منـك واليـك
كنت بيديني مير مدري مـن خـذاك
حسبي على تقصيري وحسبي عليـك
علمتني.. وش الحيـاه مـن الهـلاك
في موادعك هذا وفـي جيّتـك ذيـك
ياكيف ابلقى شخص يسواني سـواك
كل مانويت انهيك في شخص ابتديك !
أبـدى أقـارن مستـواه بمسـتـواك
واخاف لاتزعل وابيعـه واشتريـك
والمشكله : رغـم محبتـك وغـلاك
واني رغم كل شيّ مشتـاق وابيـك
ما هوب من حقي يضايقنـي جفـاك
ولااعشقك ولاالمحك ولااحتريـك !!
لكن ما يخفانـي ولا اظـن يخفـاك
حقي عليك .. انّك تطمنّي عليـك !!






. ( . طمني عليك . ) .


* .











أسبوع مرّ !! ولاوصل منك مرسـال
ياقوّ قلبك كيـف تقطعنـي أسبـوع ؟!
الجوع كافر ! وانت ماترحـم الحـال
وانا عليك مـن الولـه ميـت ٍ جـوع
ياللي غيابك صعب يطري على البـال
تركتنـي ضايـق وحايـر ومفجـوع
ماكنّـي الا: شايـب ٍ فاقـد عـيـال
وماكنك الا: محرم ٍ حق مشـروع !!
يفوع لـك قلبـي ليـا مـر الاطـلال
ياليت مالـي قلـب يشتـاق ويفـوع
حسبي عليك شلـون قطعـت الامـال
بآآآموت لاصار الامل فيـك مقطـوع
ياصاحبـي ماكـل نـزّال رحّــال
انت الحيّا من وين مارحت متبـوع !!
نسيانـي لـزول ٍ بالاعمـاق يختـال
اصعب على صاحبك من حبة الكـوع
لو الثمن في شوفتـك عمـر رجـال
كان الثمن من يوم ماغبت مدفـوع !!
ولو القدر مـا تـم قولـه ليـا قـال
ماضاق صدر ولا انحنى راس مرفوع
ياصاحبي عشقتنـي فعـل وخصـال
وانا عشقتك شعر واحسـاس وطبـوع
وشلون تتركني كذا لا اشهـب الـلال
وقدّام عيني تجف ينبوع .. ينبـوع !!
وانا عشانـك جيـت والغيـم همّـال
اسيّـل الوديـان واداحــم جـمـوع
ماردّنـي عنـك سوالـيـف عــذال
تزعل عليّ ربوع وتقـدّر ربـوع !!
كان المهم اعيشـك جنـون ووصـال
ويكون لي كلمه ولـي راي مسمـوع
واليوم ضاقت بي من الجـال للجـال
فرقاك تقصـم ظهـر وتحـز وتلـوع
لو جيت شفت الحال ماسـرّك الحـال
في غيبتك ضايـق وحايـر ومفجـوع
هذا غياب اسبوع وشلـون لـو طـال
طالبك .. لايطوّل غيابك عن اسبوع !!







. ( . أسبـــوع . ) .



* .










من بعـد مـا كنـت احسبنّـي نسيتـك
مدري اشجابك على البال وذكرتـك ؟؟
ولا وعيـت إلاّ وانـا قـدّام بيتـك !!
ماتقول انّـي قبـل مـدة هجرتـك ؟!
ذا مكاني .. لاغفـى الليـل وسريتـك
شف ّ كم لي .. ما سريت ولا سهرتك ؟
وذا مكانـك .. لا تضايقـت وجفيتـك
وشف ّ كم لك .. ماترجّيت وعذرتـك ؟
وذا مكـان قلوبنـا .. لحظـة هويتـك
فيه عمـري اختصرتـه واختصرتـك
واقف .. وكنّي مـن احزانـي بنيتـك
(جسر) .. مابين الزمانين وعبرتـك !!
آتذكّـر .. وش خذيـت ووش عطيتـك
يوم كنـت انقـاض وبحبـي عمرتـك
وآتذكّـر .. ساعـة انهـوك وبديـتـك
كيف بجروحي عن جروحي سترتك !!
وكيف بعت احلام عمـري واشتريتـك
وكيف كنت اشنع هزيمـة وانتصرتـك
وكيف كنت الملح ..لكنـي رويتـك !!
وكيف كنت الزيف .. لكني ذخرتـك !!
ادري اني جـد ّ.. مـن قلبـي بغيتـك
وادري انّي رغم كـل هـذا خسرتـك
انتظرتك .. ( عمر ) حتى اني لقيتـك
والقهر مدري على ويش .. انتظرتك !!
كنت احبك .. كنـت !! لكنـي سليتـك
ومـا بقـى سلمتـه الريـح ونثرتـك
وانـت لاا تزعـل اليـا منـي رثيتـك
بعد مـا خنـت وتوفيـت وقبرتـك !!
والله انـي .. لاحزنـت ولا بكيـتـك
مثـل مـا عمّرتـك بقلبـي دمـرتـك
بس تدري ليش عقب غيـاب جيتـك ؟
واهتدت رجلي على بيتـك وزرتـك؟؟
بشكرك .. على آخر طعونـك فديتـك
ليلة فراقك .. نسيت !! وما شكرتك !!







. ( . الخيـانة . ) .



* .












الحرب لا صارت ما بين ( ملوك ) .. يرتاح القزم ..!
قدام أجي .. و أحط خشمه / تحت رجلي .. و أفركـه
بالمختصر .. و المسألة / قدر .. و مقامات .. و عزم
اللي ما هو قدّ ( الملك ) .. مـا هـو بقـدّ المعركـه
حتى الرعـاع اللـي معيشتهـا علـى مسـح الجـزم
صـارت تعـرف الفرنكـه .. وتجيـد فـن الفبركـه
ياهيه .. يامال العمـى اللـي يخـزم عيونـك خـزم
شفني عدل .. واسترجع الماضي معي .. واستدركـه
ركزّ .. وفكّر .. فـي حيـاة الأنبيـاء أولـي العـزم
وأنت تعـرف فـرق النفـوس المؤمنـه و المشركـه
واللي خلقك بـلا ظهـر .. بتمـوت ماقيـل احتـزَم
مواقفك وش هي ؟ بلا ضعف .. ونفـاق .. وجمركـه
مـا أنـت بولـد عـمٍ قفـا .. ولا ولـد عـمٍ لـزم
سلعـه تروجهـا الصحافـه فـي زمـان الأمـركـه
فغصـبٍ عليـك تراعـي حـدودك .. وفيهـا تلتـزم
ويلك لو اسمع لك نفَس .. ويلك لـو اشـوف حركَـهْ
ياسخريـة الأقـدار .. وشلـون الجمـل حـنّ ورزم
وهـو علـى ماقيـل فمـراح امهـاتـه .. مبـركـه
لكّن خذها من لسان اللـي اليـا راغـوا .. جـزم !!
خذ الصحيح .. وغيره ذلـك صـد عنـه .. واتركـه
( الأمعه ) في كل حاجه .. مـا انتصـر ولا انهـزَم
خـارج حسابـات العقـول الواعـيـه والمـدركـه
والرجـل لاقّفـا شبـابـه .. لا ذبــح ولا عــزم
مثل المرأه وأردا شوي .. مافيه خيـر ولا بركـه !!
لأجل كذا .. خلـك هنـاك بعيـد .. وأرتـح ياقـزم
قدام أجي .. واحط خشمك تحـت رجلـي .. وافركـه





. ( . المعركة . ) .




* .











بينـي وبيـن الشـقـا ســلام رديّــه
يفتـل جروحـي وانـا انقضهـا بموالـي
عيّدبـي الهـم واثـر الـدمـع عيـديّـه
ولانـي بذاخـره دام عيونـي عيـالـي
يا عيـن هلّـي دموعـك كـل عصريّـه
وان لمتك فيوم قولي : ( مالـك ومالـي )
محتـاج طـاروق لـه معنـى وقافـيّـه
واستبشـري خيـر ! والشعـر يتهيّالـي
القـدح مـن فكـري وفالـراس جنـيّـه
وان حضّرت بي كتبت العالي .. العالـي
ما شلتها عرضـه ! ولا هـي هجينيّـه !
غنّيتهـا مـدري الـطـاروق غنّـالـي
بـس الوكـاد إنهـا : قصّـه غرامـيّـه
ابطالهـا هـمـي وغـمـي وغربـالـي
وان قالـوا النـاس : ذا طبـع الهواويّـه
قلت : استوى عنـدي التريـاق والحالـي
العشـق بلـوى ونفسـي فـيـه مبلـيّـه
خلونـي اكتـب وافضفـض لا تفضالـي
المسألـه أكبـر مـن احــلام ورديّــه
الحزن لا مـن لفـا جيتـه علـى فالـي
حزني واعرفه واعـرف ابسـط مواريّـه
ولاني لحالي كثير اللي عـرف حالـي !
يا وجـد حالـي وجـود اللـي هقاويّـه
خانتـه باغلـى رفيـق ولا لقـى والـي
وياوجـد حالـي وجـود اللـي بناخيّـه
عن عسر حاله وضيقه دالـه وسالـي !!
فـي غيبـة اللـي تـمـادى بالانانـيّـه
وخلاني بوجـه حزنـي واقـف لحالـي
يا موّسـع الضيـق لامـن مـر طاريّـه
كن الوسيعه تضيق ان مر فـي بالـي !!
وين انـت ؟ ياللـي غيابـك مثـر ٍ فيّـه
غايب !! واحسك معي !! واشوفك قبالي !!
طيفـك ليـا مـر حاجـه لا إراديّــه !
اتبع سرابـه واجيـه اسابـق ظلالـي ..
ياللـي مـن حروفـك تغـار الرومنسيّـه
والله قبـل لا افقـدك فاقـدك جوّالـي !!
في ( بحّتك ) شي ؟! يشبه حزن مرثيّه !!
ومن غاب صوتك وانا اللي صدق يرثالـي
وعيونـك السـود إعـجـاز وخيالـيّـه
نادر شبههـا مثـل مـا تنـدر خصالـي
ونظرتـك تهـدم كيانـي بكـل عفـويّـه
سلهم وشف كيـف يبـدى فـي ّ زلزالـي
وعودك ليـا مـال يـا المتـرف بحنيّـه
قمـت اتعـزوى واطـوّح لجلـه عقالـي
وقلبـي علـى ظمّتـك يسـابـق يـديّـه
ويردني طيـب ابـوي ومرجلـة خالـي
تكـفـون يالـلـي تمـرونـه علانـيّـه
قولوا له : الموت لامن غـاب يبرالـي !
وقولوا له : ان غيبته مـا هيـب عاديّـه
وخلوه يرجـع يشـوف بعينـه احوالـي
وقولوا لـه : انـه ذبحنـي لعنبـوا حيّـه
ما يرحم الشوق غالي ينتظـر غالـي !!
وقولوا لـه : ان صـد والصـده نهائيّـه
اشوالي آصـد !! لا والله وش اشولـي !!
حيل الله اقـوى عساهـا روحـه بجيّـه
وعسـاه مـا يبطـي ويرجـع ويسعالـي
وقولوا له : الله حسيبـه كـان لـه نيّـه
ما عاد يرجع لـي وقولـوا لـه التالـي :
حرام كلّي ( ظمـا ) وايديـه ( وسميّـه )
وحرام ( مالي أمل ) مدامه ( آمالي ) . !






. ( . سلام رديّه . ) .



* .















خـاف ربـك ولا انـا لا تخـاف منـي
وقفل الموضوع !! والدعوه عوافـي ..!!
مـا علـيّ اخـلاف لا ضاقـت اغنـي
يا وسع صدري ليـا غنيـت قافـي ..!!
دام شعـري كنـز رد العـلـم عـنـي
لا اكتشفته كيف ما افرح باكتشافـي ..؟!
سعـد عينـي لاطـرى فالبـال كـنـي
قايـم بواجـب ولـد عـم ٍ سنافـي ..!!
وانت خبت وخـاب مـع خيبتـك ظنـي
وافي بجيّتـك .. وبروحتـك وافـي ..!!
جيـت مـن دنيـا المعـانـاه متعـنـي
ورحت عايفني !! وقلبـك امتعافـي ..!!
الحزن مـن جيـت بـه عانـه سكنـي
امتولّجني وانـا مـا قلـت : كافـي ..!!
والفـرح لا رحـت بـه فـدوه لأنــي
عارف ان كلي ( خطا ) قبل اعترافي ..!!
وأدري انـــك اتمـنـاهـا تـمـنـي
فرحتك ( عاقر ) وبشرّها ( بلافي ) ..!!
لا قهـرنـي ذا الغـيـاب ولا غبـنـي
تنثني رجلـي قبـل يقصـر لحافـي ..!!
والشعر رحمـه !! وكنـي يـوم اغنـي
قايـم بواجـب ولـد عـم ٍ سنافـي ..!!






. ( . الشعر رحمـه . ) .



* .











يالله ثبتنـي .. علـى درب الهدايـه والهـدي
واغفر ذنوب ٍ فوق متني .. كـل يـوم أشلهـا
اسألك حسن الخاتمه لا جات لحظـة موعـدي
وأعوذبك مـن شـر بقعـا والصـدور وغلهـا
واليا اجتهدت بماقفي طالبك لا يضيـع جهـدي
واسألك تمنعنـي مـن الزلـه قبـل لا ازلهـا
وتعين رجليني بطاعـة شايبـي علـى العـدي
وتزرع محبة خدمته فـي خافقـي .. وأجلهـا
فإن طبت في خدمة ابوي اشوف طيبي بولـدي
مثل .. مثل .. ما هيب لحية ليتهـا يـا علهـا
وانك تثبتني .. على نهج المراجل لا .. غدي !!
حنا بزمن !! فيه الرجـال الوافيـه يـا قلهـا
فالرجل لولا الدين والاخـلاق والكـف النـدي
ما كنه الا الشجره اللـي مـا يظلـل ظلهـا !!
والشاعر ان ما راوده الاحساس بانـه مبتـدي
يعمي الغرور عيونـه ويكشـف عيوبـه كلهـا
وانا اعتبرت الشعر دمعه تسكن براحـة يـدي
أليا حزنـت أهلهـا .. وأليـا فرحـت أهلهـا
واليوم هذا غير !! كن الشعر في كـل جسـدي
لا جف ريق أعذب بحور الشعر !! جيت أبلهـا
وفي مدحكم يا أهل الحفل يطيب مـوال الشـدي
ومن شانكـم تتسابـق بيوتـي عشـان أهلهـا
انا انشهد الجلاّل مـا فيهـم ضعيـف ولا ردي
لهـم مكانـه تبطـي الردّيـان مـا تاصلـهـا
لو كان ما فينا عضو ولا وزيـر ٍ فـي بلـدي
من طيبهـم نعقـد حبـال الواسطـه ونحلهـا
ونيابة ً عن الرجـال اللـي كرمهـا سرمـدي
اللـي جمعتنـا فـي ضيافتهـا وفـي محلهـا
يا مرحبا ترحيبة ٍ مـن بيشـه إليـا الاحمـدي
باللابه اللـي سجلـت كـل الشـرف بسجلهـا
سهول ولاّّ سبيـع ولاّ سهيـل وأخـوه الجـدي
ألا الوكاد ان كلهـم واحـد وانـا فطـن لهـا
فالجد ولا فالمكانه .. فوق .. فوق .. ومقصدي
عيينين في راس .. وقلـوب الحاقديـن نعلهـا
نطّاحة القالـه هـل الطالـه كعـام المعتـدي
صفوة رجال اللي حكم شبـه الجزيـره كلهـا
مثل السحاب اللي ترزم واسبـل وهـلّ بـردي
نارد على حـوض المنيّـه والسيـوف نسلهـا
حتيييش لو درب العُلا صلف وصعيب وجرهدي
الله خلقـنـا للصـعـاب وللقـمـم نحتلـهـا
إليا رضينا .. نفرش الدنيـا بسـاط ٍ أحمـدي
وإليا زعلنا .. تبكـي عيـون الخليلـه خلهـا
واللـي يبـي يفلـح يقلدنـا وفيـنـا يقـتـدي
يعمل عمايلنـا إذا هـو قدّهـا كفـو ٍ لهـا !!
حنا شرحنا للبشر معنى ( سنافـي واجـودي )
هـذا طريـق المرجلـه ياللـي تبيهـا دلهـا
قوم ٍ لنا في صفحـة الأمجـاد تاريـخ ٍ مـدي
سلايـل ٍ تغنيـك دق فعولهـا عــن جلـهـا





. ( . ســـهول و سبيع . ) .



* .










يهزني الموت وطـاري وحشـة قبـوره
وتطري ذنوبـي علـي وربـي ادرابـي
واحس فـي داخلـي هالـروح مذعـوره
و ايمـم الوجـه للخالـق ولا القـابـي
سوى امنية شاعـر ٍ خجلـه ومغـروره
وخوف وطريق وبقايا طيبـة اصحابـي
واحساس لـو اكتبـه بتعاتـب سطـوره
حظـي وطيبـي وعقلـي واول احبابـي
يارب .. ساعدني ابني حلمـي وسـوره
ودي اشـرّع لـبكـره .. كـل ابوابـي
تعبت اشـوف النهـار بدفتـري نـوره
واجامل الليل واقول انـه (( اولابـي ))
يا عين لاهنتـي وعـن جـد مشكـوره
يا ما حشمتي سـواد الليـل باهدابـي !
قلتي : زهقت الظلام وقلـت : معـذوره
ما دام جسمي عجز عـن شيلـت ثيابـي
تبت يديـن الصبـر لا طالـت شهـوره
ما هي بسهله سنه ناطر علـى اعصابـي
قدام عينـي تطيـح احـلام .. مقهـوره
يا رقة القلب .. ويش القلـب .. سوّابـي
مانـي مكمـل ياهـمـي دام مسـتـوره
بيني وبينك ( قصيدي ) واعتق اسرابـي
لان ( الشعر ) لا طرالي جفت بحـوره !
واحس كنه يموت بـصفحـة كتابـي !!
لانـي احبـه واحـب اراعـي شعـوره
احسب حسابه مثل ما يحسـب حسابـي
ابيه لامـن حظـر يجمّـل ... حظـوره
وان قدّر الله وغبت؟؟ يقـدّر غيابـي !!
شاعر ( ماهوجس ) بقولة كم جمهـوره ؟
يكفيني ان ما كتبته (( كاسب اعجابي ! ))








. ( . يـا رقة القلب . ) .



* .














يستشف ( الضايـق ) شعـور الرحابـه
لا وقف ( تايب ) على ابـواب المساجـد
جعل ما لـي غيـر دعـوة مستجابـه :
تنقبـض روحـي وانـا خاشـع وساجـد
وجعلنـي فـي عيـن ربعـي والقرابـه
نايـف ومستـور ومشـبّـب ومـاجـد
أخلـق مـن الشعـر للضامـي سحابـه
وللمسا شمـس ٍ مـن خيـوط العساجـد
وفـي زمـان اللامـحـال ولا غـرابـه
صعب تلقى ( قلب حي ّ) .. وصعب تاجد :
واحـد ٍ يـردع صديقـي عـن غيـابـه
ويبلغـه عنّـي ليـا عــض النـواجـد
الصـداقـة مـاهـي بشـعـر وكتـابـه
الصداقـة : موقـف وفـعـل وتـواجـد
أسمي و جهـدي علـى راسـه عصابـه
لا هجده مـن الزمـن والضيـق هاجـد
مير .. لا صـارت قصيـد ومـا يشابـه
يرخيّ الدينـار .. والشعّـار وااااجـد !!





. ( . دعـوة مستجابة . ) .



* .












لا رقص جن القصايد وابتدى نظـم القصيـد
وارتفع جـو المعانـي وانحبـك در الكـلام
بعـدوا اقـرب خيـال وقربـوا ابعـد بعيـد
واسمعـوا شعـر ٍ سطابـي عيفنـي المنـام
شاعر ٍ بأول شبابـه طـوع القـاف العنيـد
اشهدوا له خيرة الشعّار واهـدوا لـه وسـام
جابهـا بيمنـاه يـوم انـه تولـع بالنشـيـد
وجنب الـزلات والهفـوات ودروب الحـرام
عـارف ٍ ربـه وابـوه معلمـه راي ٍ سديـد
جوّد وصاته لجل يبقـى كريـم ابـن الكـرام
مطابق ٍ اسمه اسـم جـده ولا يمكـن يحيـد
عن طريق اللي تسمى به ويبقـى لـه امـام
دامني (لمحمـد ابـن نهيـر) اتسمـى حفيـد
والله ان ابقى على شموخـه وطيبـه بالتمـام
يا قصيدي اشهد ان هالموقف لشـرواك عيـد
شاقني مدح الرجال اللـي بهـم محـد ٍ يـلام
عزوتي ثم تاج راسي محزم الوقـت الشديـد
لابتـي يـا لابتـي ياللـي تظيـم ولا تظـام
سهول مجد العـز ولا قالـوا العـز المجيـد
يكفي لاقت سهلي يوقف لـك الكـون احتـرام
لابـة ٍ مـن طيبهـا ربـي خلقهـا للمفـيـد
في اثرها تلقى كـل النـاس تمشـي بانتظـام
طيبهم مخلوق معهم يسري في وسـط الوريـد
ينطح الماجوب واصغرهم ولو عـاده غـلام
جارهم داله وسالي مزبـن الجالـي الشريـد
المشاكيـل الحلاحيـل الرجاجيـل العـظـام
كانها بالطيش كم شيـخ ٍ غـدى منهـم فقيـد
وكانها بالسلم واخذ العلم هـم رمـز السـلام
(قاتلين الروم) دون الحق وهـم سـد ٍ عتيـد
عابدين الـرب حلويـن النبـا رووس الانـام
لابة ٍ من فضـل ربـي كـل مافيهـا حميـد
اسمها لو تذكـره فـي موقـف ٍ زال الغمـام
لابـة ٍ تذكـر وتتشـرف بهـا ثـم ٍ تشيـد
صفحة التاريخ والعربان تخصيـص ٍ وعـام
بعدها يا افكار شعري ارسلـي عبـر البريـد
السلام اللـي يليـق بربعـي عاليـن المقـام
صافحيهـم بالمعـزه خـد خـد وايـد ايـد
ياسـلام الله عليـهـم يـاسـلام الله ســلام
وارسلي اول تحياتـي علـى ربعـي وازيـد
التحيـه (للزقاعـيـن) بتمـعـن واهتـمـام
منبـع الجـود بزمنـا والكـرم فيهـم مديـد
طيبهـم طيبـاه درع العـز للفزعـه حسـام
تجفل جبال وتهيج بحـور ثـم تجتـاح بيـد
لا تعزوي في (علي) حر ٍ تضايق ثـم حـام
وارسلي من بعدها من خاطر ٍ رايـق سعيـد
التحيات لبني عمي هـل الصيـت اللـي دام
(للبـرازات) ارفعيها(للمحيمـيـد) بجـديـد
خطي زفيها و(للظهـران) توقـف باحتشـام
و(للصعوب) و (آل محلف) تحية(ن) كنها(عقيد
قوم ٍ بحرب ٍ حمـى فيهـا حلالـه باحتـدام
واعتلي لا(لاد سلطـان) وسـلام ٍ مـا يهيـد
وارقـي يـم (آلاد قبـان) بتحيـات ٍ كـرام
والسلام اللي في صدري ينجرف مثل الجليـد
(للعبيد)و(ال منجـل) سقتـه بكـل انسجـام
ياكبر حظي وانا اسمي اخـره اسـم ٍ فريـد
لاد سهل شهمنـي لاصرتـوا للشـده حـزام
ولا على كـل القبايـل زود للدنيـا رصيـد
تستحق المدح من صنعا الـى اطـراف شـام
وختامها صلوا على الهـادي شفيـع ٍ للعبيـد
كثر ماصلـوا وسـط مكـه تراويـح وقيـام
من محمد بن جـار الله بـن محمـد ال زيـد
يا سلام الله علـى ربعـي سـلام الله سـلام






. ( . يكفي لا قلت سهلي . ) .



* .










يا كبر ذنب السـؤال .. ويـا ثقـل دم الاجابـه !!
لا انتهى حبك وصدرك مختنق بحروف (( ليه )) ؟؟
وقتها كن خافقك ( جالي ) وحزنك ( شيـخ لابـه )
اتصـدّد .. لكـن الدنيـا تحـدك.. تنتخـيـه ..!!
يـا رفيـق الهـم .. علمنـي اذا عينـي ربابـه .!
منهـو يسمـع نزفهـا لامـن نظرهـا ويحكيـه ؟؟
بسئلـك بالله قلـي : عـن شقـا الـدرب وسرابـه
كيف علقني بكذبة .. (( باكر اوصل وارتويـه !! ))
لو فقلب الليـل رحمـه مـا فتـح للجفـن بابـه :
وعشمه في حب نجمه .. يدري انهـا مـا تبيـه !!
ولو يضيق الكـون بالطعنـات تلقـى بـي رحابـه
لا تعكر بال خنجر .. تركـض ظلوعـي تجيـه !!
لا يشيـل الهـم ( همـه ) دام تجمـعـه القـرابـه
في صدر شاااعر يعـده : واحـدٍ منـه و فيـه ..!!
له علي .. دامـه يبينـي مـا اخونـه فـي غيابـه
كان ما جالي اجي لـه .. يحتوينـي واحتويـه ..!!
ولي عليه .. انه مـا ينسانـي ويصفطلـي عذابـه
ولا يعرضني لضحكٍ صدق مـا عـاد اشتهيـه ..!!
اقسى من حزني وهمي الفـرح حضـرة جنابـه !!
لا طرى ما يطري الا.. منهـو عرفنـي عليـه ..!!
ذاك مـن يحكـي علـى عينـي وتقنـع باغترابـه
لجل تعتق صورةٍ فينـي سجنـت كـل الوجيـه ؟!
غايتي ( فرح الحـزن ) لا ينكسـر بالقلـب نابـه
وخوفي لا ( حزن الفرح ) يخنق لي انفاسي بيديه !!
من ورى قلبي رسمتـك غيـم يحكـي بـوح غابـه
كـل غصـنٍ منحنـي فيهـا يمدلـه راحتـيـه .؟
هاك صـدري شـوف بعيونـك متاهـات الغلابـه
فـي شـوارع هالحنايـا كـم متشـرد نـزيـه ؟؟
لا قبل عطف السنين .. ولا رضـى بسلـم الذيابـه
ما سئل كود الاماني .. يـا الامانـي جاوبيـه ..!!
ويش اقول وويش اخلـي .. والبـلاوي مـا تشابـه
غير لا قالت في قلبـي لا حشـى مالـي شبيـه !!
ليت في وجه الزمن (( ذرة حيا )) واحسب احسابـه
احشمه لجل يحشمنـي .. دون شـي ٍ أحتريـه ..!!
وليت شعري مـا يخيّـب هقـوة اللـي قـد هقابـه
لا تولّـج هاليميـن وصحـت فيهـااا اكتبيـه .!!.
وليـت دربـي لا نثنـت رجلـي يقدرنـي ترابـه
كان وربي ما احاتي قولت : ( ازرى ينتهيـه ) ..!!
بعدهـا بذيّـل اسمـي بآخـر دمــوع الكتـابـه
دام كل بيـت بقصيـدي شـال دمعـة مـا يليـه !!
هذا انا يـا صاحبـي حلمـي الاقـي لـي اجابـه
لا انفجر صدري وضاقت دنيتي بحروف (( ليه )) !!






. ( . حزن الفرح . ) .



* .


ليت لي حيله واجي واحتال بـك
وليت ما قلت بحياتـي ليتنـي !!
يابري حالي ليامـن مـال بـك
التغنّـج والدلـع .. لا جيتـنـي
دوم احس انـه نعاسـك غالبـك
معنّي رموشك ! وانا عنّيتنـي !
بس .. ذا المره ما طاب الفال بك
جيت ولـدرب الجفـا حديتنـي
لكن اسمع هالشعر وش قال بـك
دام صبت اللي تبـي واخطيتنـي
الغـلا حقـك ! ولانـي سالبـك
ابسـط حقوقـك ولـو مليتنـي
شوف عيني يوم دمعي سال بـك
ضمتـك حتـى ولـو ابكيتنـي
وانت رغم اني شغلت البال بـك
سلت مع دمعك ولا ضميتنـي ؟!
كـان بـه شـي ٍ عليّـه قالبـك
بطلبـك حـاجـه اذا خليتـنـي
لانويت تحب غيري .. طالبـك
لا تحبّه كثر مـا حبّيتنـي . !!!






. ( . طالبــك . ) .



* .









يا عيـن كـنّ الدمـع ماعنـه مجنـاب
ولا كـل رجـال ٍ فقـدنـاه نبكـيـه !
تغـورقـي بالمـلـح والمـلـح لا ذاب
المحجّر اللـي جـفّ بسيـل واديـه !
وان كان حرّ الدمـع ماجـرّح اهـداب
ليه البُكا والحـزن يـا مدمعـي ليـه ؟
ذيب الشقا يقنـب علـى راس مرقـاب
يا مصبّرين القلـب فـي مـوت غاليـه
الموت نرضابـه بـلا شـرح واسبـاب
نرضى بحكـم الله ونصبـر وندعيـه :
يغفر ذنوب الفيصلي ( ستـر وحجـاب
أمـة محمـد ) دون شـي ٍ تحاتيـه ؟!
يا ( نجد ) عم الحزن وديان وهضـاب
ويا ( حجاز ) كل جبالك اليـوم تنعيـه
و ( حايل ) كست سلمى من الهم جلباب
و ( عرعر ) حكت حزن الشمال ومعانيه
و ( نجران ) من زود العنا تفتح كتـاب
حزن الجنوب وتنقـل اصـدق تعازيـه
وهلّ ( الخليج ) الدمع في راس مشعاب
و ( البحر الاحمر ) كن جـده تواسيـه
وياكويت حزنك غير ! ومصابك مصاب
في موت مـن حـرّر قيـودك بأياديـه
اللـي فتـح للفزعـه بيـوت وابـواب
ولعيون ارض الخير غامـر باراضيـه
وانا مابيـن الحيـره وفقـد الاعصـاب
عجزت لا اكتب بيت واحـد واغنيـه !
كني من البارح مـن الشعـر مرتـاب
شاعر وفاقدلـه وطـن كيـف يرثيـه ؟
ماهي بلحيـة تعزيـة شعـب واقـراب
لا والله الا كــل مسـلـم نـعـزيـه
هـذا مليـك المجـد فكـاك الانشـاب
يـا قـرب فزعاتـه ومبعـد هقـاويـه
عـلّ السحـاب يهـلّ مـن آب لا آب
علـى قبـر فهـد الجزيـره ويسقـيـه
اللي مـرض وقلوبنـا حولـه اسـراب
ومـات ودعاوينـا لـربـه تخـاويـه
وسع حرم / طبع كتب / حارب ارهاب
ومكـه وطيبـه تفتخـر فـي مساعيـه
مثلـه يغيّبـه القـدر ميـر مـا غـاب
ومثله يمـوت ولا يمـوت الفخـر فيـه
يا كثر من راحوا مـع الوقـت غيّـاب
ويا قل من باقي علـى الارض طاريـه
سجل يا تاريخ الشرف صفحة اعجـاب
للي يعيـش الحاضـر بخيـر ماضيـه
وللمرجلـه موقـف وللـنـار شـبّـاب
وللحكم ابـو متعـب وابايـع ويكفيـه :
من قبل تُعلـن بيعتـه بيـن الاقطـاب
قامـت تبايـعـه القـلـوب وتزكـيـه
والجمله اللي ماهي بحاجـة اعـراب :
مـاكـل رجــال ٍ فقـدنـاه نبكـيـه





. ( . مرثية الملك فهد . ) .



* .











الرضـى غايـة .. وميقافـي وسيلـه
حانـت الفرصـة وجيـت ابغتنمـهـا
شاعـر ومطنـوخ وامـثّـل قبيـلـه
اتقـدم باسمـهـا وارفــع علمـهـا
وقفتـي مـن دونهـا وقفـة جليـلـه
انشد كبـار الاسامـي مـن دحمهـا ؟
عشت يا راسـي وانـا راع الجزيلـه
الطـم الحسّـاد واضـيّـق نسمـهـا
امـدح الطيـب علـى راس الطويلـه
واكـوي الـرديّـان واذوّب شحمـهـا
ولانـي بجحّـاد فضـل ولا فضلـيـه
احفـظ حقـوق الجمايـل واحترمهـا
و ( مجحم الجـلاّل ) فرقبتـي جميلـه
فزعته فزعـه وجعلـي مـا عدمهـا
و ان زهم شـرد البيـوت المستحيلـه
كّنها العسكـر ليـا صـاح وزهمهـا
تاقف بلازمه طـوع .. وتنحنـي لـه
والله ان كنـه علـى لسانـه نظمـهـا
مرحبـا بضيـوف كسّـاب النفيـلـه
من رجـال ٍ يعشـق الترحيـب فمهـا
و المدايـح فالـردي عيـب وفشيلـه
من يـزوج بنتـه الخايـب ظلمهـا !!
و مدحة الطيّب علـى الطيّـب قليلـه
تنعـزم فيـه المدايـح مـا عزمـهـا
مثـل زحزيـح المهـمـات النبيـلـه
كم قضية ( فيصل المالك ) حسمهـا ؟
الشهامـه والشجاعـه تنتـمـي لــه
و الـوزارة طيـب وقفاتـه خدمـهـا
و المناصـب حالهـا حـال الكحيلـه
تطـرح الخيّـال كانـه مـا شكمهـا
و انت وافـي دم وعـروق وفصيلـه
كفـك اللـي عنّهـا واللـي لجمـهـا
تـدرك الانجـاز بامـرك وتعديـلـه
ولا تجنّـب عنـه لـو يسيـل دمهـا
السفـاره عـز .. و اليمنـى طويلـه
تضرب حصـون الرخامـة وتهدمهـا
فاضـل وتواضـعـك زادك فضيـلـه
كفو يـا هيبـة هـل الحكـم وشهمهـا
الفعـل نــادر ولا نلـقـى مثيـلـه
و ان بغيت الصادقـه منـي استلمهـا
خارجيتنـا هـرم .. وبكـل ليـلـه:
ينذكـر فعلـك علـى قمـة هرمـهـا
والهنوف / الكايـده / بنـت الاصيلـه
الغنج .. مـن راسهـا لاسفـل قدمهـا
علموهـا .. تقـوم و تفـل الجديـلـه
و تطمح .. لزيد المليحي .. عن حرمها
المهيـل الـلـي مواقيـفـة مهيـلـه
بصمتـه فـي قمـة الطالـه بصمهـا
ابو يمنـى ٍ كنهـا ( بحـر المسيلـة )
تكرم العربـان مـن فايـض كرمهـا
فزعتـه يـوم الزمـن وقفـة وميلـه
فزعـةٍ يصعـد ولا ينـزل سهمـهـا
فيه من ضـرب الرهيفـات الصقيلـه
و فيه مـن روس الطويـلات وقممهـا
وفيه مـن نـو ٍ تجـود بـه المخيلـه
و فيـه فوعـات الطحاطيـح وقيمهـا
وفيه قطع الذكـر .. لليمنـى البخيلـه
وفيه قطع الشـوف.. لعيـونٍ لطمهـا
جعل من تشنـاه فـي جمـر المليلـه
لين ينضج فاللضـى الحامـي لحمهـا
صامـل الوقفـات نـطّـاح الثقيـلـه
غلـق علـوم الرياجـيـل وختمـهـا
يا المليحي زيد .. مـا لـك فالطويلـه
و الله انـك رايـة الـعـز وعلمـهـا







. ( مجحم الجلال . ) .


* .














النص / حالة تجـرّد / فلسفـه حـرة
محـاولـة للتـوّحـد والخصوصـيّـة
علاقتي فيه : حب ومن طـرف واحـد
نزعاتهـا تفتـقـد نـزعـه ثنائـيّـه
كريم .. وإكرامـا ً لجيّتـه فـي بالـي
ذبحـت لـه منهـج ومطلـع وقافيّـه
وعزمت .. ما لا كتبته مـن قناعاتـي
ومـا تيّسـر مـن أحرفنـا الهجائيّـة
يا ضيفي المتعب من الضوء والشهـرة
الليلـة أنسـى معايـيـر النجومـيّـة
خذ راحتك واترك إحساسي ورى ظهرك
شاعـرك مستـاء و أفكـاره جنونيّـة
يؤمن بأشيـاء : مـا يقـدر يفسّرهـا
ويكفـر بأشيـاء : جبريّـة وحتميّـة
الكون في نظرته مـن شرقـه لغربـه
كل شي ّ في داخلـه مسلـوب حريّـة
الروح مسجونـة فـجسـم البنـي آدم
والآدمي منسجن فـي كـوره أرضيّـة
وبالرغم من كبر حجم الكوكب المائـي
الأرض مسجونـة بقـبّـة سمـاويّـة
لذا يكون الخضـوع أحيـان بالفطـرة
تحت أسس واضحـة لأحكـام كونيّـة
والدين في نظرته مـن وحيّـه لفقهـه
أسمـى رتـب الاحتياجـات الغريزيّـة
تأكيـد لا منطقـيّ الفكـر بالمنـطـق
وتجسيد الإعجاز فـي فكـرة بديهيّـة
إعطاء الإنسان معنـى إنسـان فعليـا ً
إحساسـه بقيمـة العيـش بشموليّـة
لذا يكون الرقـي فـي أعظـم أحوالـه
تعلّـق الــذات بـالـذات الإلاهـيّـة
والحكم في نظرته مـن عدلـه لظلمـه
تصحيح الأخطاء في صـوره ضبابيّـة
تصريح بـان الحيـاة المقبلـة أجمـل
وتوضيح معنـى الفخامـة والرفاهيّـة
وفساد الأرض وخضوع الحق للباطـل
الحاصل مـن الصراعـات السياسيّـة
لذا تكون الـدول فـي العالـم الثالـث
هيئـة لتنفيـع مجموعـة حرامـيّـة
والشعب في نظرته مـن بعضـه لكلـه
الركـض خلـف التفاهـات الكماليّـة
تكريس الاذهـان فـي مـا لا ينميهـا
برنامج .. مسابقه .. جلسة رياضيّـة
اهـم شـي العقـول تكـون مشغولـة
فأشياء لا يمكـن تسمـى : مصيريّـة
لذا تكـون الشعـوب اجسـاد تتكاثـر
وتمـارس الدجّـه بصـورة جماعيّـة
والمجتمـع مسرحيـة والبطـل فيهـا
أفضـل ممـثـل لتمثـيـل المثالـيّـة
والانتمـاءات للأفـكـار والمـذهـب
ماهيب محصـورة بموطـن وجنسيّـة
تشل جسـم البلـد وتشتـت الوحـدة
تزرع تفـرّق وتجنـي حـرب أهليّـة
والناس فالناس مدري ويـش مشغلهـا
حسبي على نزعـة النفـس الأنانيّـة
تخلـي الآدمـي مشغـول فـي ربعـه
عين فبني عمـه وعيـن فبنـي خيّـة
عنده حساسيّة مـن الناجـح الاقـرب
والقـرب لا زاد .. تـزداد الحساسيّـة
ولو انه مراقب أوضاعـه و مصلحهـا
كـان العلاقـات بالغـالـب حميمـيّـة
والرجل لابـد يصنـع نفسـه بنفسـه
ويجابـه المستحـيـلات بعصامـيّـة
تحفـظ قياسيّـة الارقــام وتسـجّـل
من أجـل تحطيـم الارقـام القياسيّـة
وتعامل الشخص مع غيره يبيّـن لـك
مقـدار مافيـه مـن أزمـات نفسيّـة
والرحمه اصدق مشاعرنـا وأروعهـا
لله در .. الـتـواضـع والمحـنـيّـة
وممارسة قوة السلطة علـى ضعيّـف
ردة فعل ناتجة عن ضعـف شخصيّـة
على التناقض تعيـش العالـم وتحيـى
بعقـول وحـده وبافـكـار انتقائـيـة
ولا هو ضـروري طبايعهـم تفرقهـم
الاختـلافـات أحيـانـا ً ظـروريّـة
ما يجذب الموجب إلا روعـة السالـب
والضـد بالضـد قمـة بالرومنسـيّـة
خذني مثل حي رغم إعجابـي بنفسـي
وتقديري لكـل طبـع وخصلـة ٍ فيّـة
عمري ما حبيت وحده طبعهـا طبعـي
أنـا حيـاوي ولا أحـب الحيـاويّـة
اسرفت واعذرني اليا اسرفت يا ضيفي
الليلـة زيارتـك مـا هيـب عـاديّـة
اليا متى والشعر مـا يشبـه الشاعـر
وعلاقتـه فيـه محـدودة ورسمـيّـة
لكن خلاصة حديـث المـدرك الهايـم
فـي وادي افكـاره الغـرّ الفجائـيّـة
لو كل ما سـاد بيـن النـاس مقنعنـا
ما عاش الابـداع فـارض الاتباعيّـة
مع وافر الكـره والتحقيـر والضيقـه
سحقا ً .. لكـل السخافـات الوراثيّـة








. ( . قناعـاتي . ) .


* .










لاصرت بايعني اشوفك على خيـر
مـع السلامـه دام مابـه سلامـه
قلت انتهينـا قلتلـك خيـر ياطيـر
ماني باول شخص يخسر غرامه !
محذرك من قبلهـا الـف تحذيـر
لا عفتني بيعيف قلبـي هيامـه 00
مانيب بميت لا ولا احتـاج تبريـر
صح الله لسانـك و وفـر كلامـه
بسمعك حبكـه وفكـره وتصويـر
وافهـم عـدل يامدعـي بالفهامـه
وجه الشعر ابيض ويحتـاج تغييـر
ودي تزيَـن هالقصيـده عـلامـه
ماضيك الاسود ابذكره دون تقصير
كذا يكـون بخـد هالشعـر شامـه
يصدق معي تعبير ويخـون تعبيـر
ياضيعة الشاعر بوقـت انسجامـه
يمكن خطـا ادورك بالشعـر ميـر
لو ماحترمتـك للغـرام احترامـه
ماكان حبك غير بس طعنتك غيـر
علمتنـي معنـى النـدم والندامـه
ماجـاك منـي أي زلـه وتقصيـر
كل ماخطيـت اعاتبـك بابتسامـه
حسبي على الذكرى اذا هبت عصير
ماعـاد تنفـع شرهتـي والملامـه
البال ضامي وقتها والحـزن بيـر
خسرتك وهمَـي كسبـت اهتمامـه
واليل فازع لك كذا جانـي مغيـر
ظلمتنـي واكثـر ظلمنـي ظلامـه
لااقبل علي اوحيت صوت المسايير
وفزيت كل ضيـفٍ اقـوم بمقامـه
وليا عزم هالليـل ضيقـه وتفكيـر
قلـي بربـك كيـف بقـدر انامـه
مافيـه داعـي للعتـب والمعاذيـر
الغدر خال الجرح واطيب عمامـه
اما يجيب الله مطـر تالـي وخيـر
والا السلامه ماش .. مامن سلامه !






. ( . شــامه . ) .



* .












اللي مثلـك يـا حبيبـي مـا يـلام !
قوم وانسى الدمع .. وانساني معـه !!
لا تحاتي الليـل ! ودعنـي .. ونـااام
السهر مـا هـو بضيـق الا سعـه ؟؟
خلّنـي مابيـن كذبـك !! والـغـرام
بنثـره وآخـر طموحـي اجمـعـه ..
بك ( ختمت المسك ) يا ( مسك الختام )
واحفظ ( اغلى ) بيت وانسى ( مطلعه )
( شاعرك ) لا شحّ صوتـه بالكـلام ؟
ناظـر عيونـه كلامـه تسمـعـه !!
ما ورى هـاك الطعـون الا الخصـام
ومـاورى وصلـك وقربـك منفعـه ..
عدّني مـا كنـت وانسانـي .. مـدام
الفراق اصبح : ( جهاتي الاربعـه ! )
خابـرك حسّـاس وتخـاف الزحـام !
خاف قلـب ٍ بـه همـوم مجمعـه !!
إعتـقـه لله !! واتـركـه بـســلام
ما بقى بـه عـرق تقـدر تقطعـه ؟!
ضامي واطرد سرابك ( نصف عـام )
حالتـي حالـه ! واجامـل واتبعـه ..
كل ما طـاح ( الامـل ) شلتـه وقـام
لين طحت ! ولا لقـى مـن يرفعـه ؟!
غلطتي كنـت انتظـر منـك اهتمـام
وغلطتك ( بُعدي ) ثمنها و ( ادفعـه )
لا تقـول البُعـد والفرقـا حــرام ؟؟
الحرام : اعطيك ( عمر ) تضيّعـه !!






. ( . كذبك و الغرام . ) .



* .











المـوت مـوت القلـب ودمـوع الاعيـان
توّصـل الإحسـاس بـأصـدق وسيـلـه
والشعر بـوح الصـدر والشاعـر أحيـان
مايـدري بحزنـه سـوى طـول ليـلـه
ومن طول ليـل البـارح وثقـل الاحـزان
عرفـت وش معـنـى اللـيـال الثقيـلـه
مـا والله اصعـب مـن شعـورك بفقـدان
الـلـي معلـمـك الحـيـاه الجمـيـلـه
الا انـك تحـاول تترجـم علـى (لسـان
شعـرك) مشاعـرك الجـسـام العليـلـه
وشلون اغنـي لا نشـف ريـق الالحـان
وشلـون ابكـتـب والمعـانـي بخيـلـه
في مـوت اميـر قلـوب ومعلّـم اذهـان
وريـث مـجـد آل الصـبـاح وسليـلـه
مفنّـي حيـاتـه بالمـكـارم والإيـمـان
العـادل اللـي راح مــا بــان ميـلـه
حتـى خبـر موتـه قبـل صـوت الاذان
كـنـه يصحّيـنـا لكـسـب الفضيـلـه
يـا جابـر العثـرات والـدمـع هـتّـان
ليـت الدمـوع تــرد خــل لخليـلـه
يـا سيـدي مـت ومعـك مـات نسيـان
طيبـك وقــدرك والفـعـول الجليـلـه
غبـت وبقيـت لطيبـة القلـب عـنـوان
وغبـت وتركـت الخيـر يفقـد عميـلـه
وغبت وحكت (الابراج) عن حزن (دسمان)
وسيّل دموع (السِيـف) حـزن (المسيلـه)
ورغم اختلاف الشعـب بعـروق واديـان
فـي حــب جـابـر كلبـونـا قبيـلـه
ابـو اليتامـى والأرامــل والإحـسـان
راع الجمـايـل واليمـيـن الطـويـلـه
مـن طيبـه بشعبـه تمنـتـه الاوطــان
يـا كثـر مــن ودّه بحـاكـم مثيـلـه
وان قارنـوا مـا بيـن ذربيـن الايمـان
تـفـرق يميـنـه بالعطـايـا الجزيـلـه
ويوم انطعن مـن كـف غـادر وخـوّان
سـوى السـواه الصعـبـه المستحيـلـه
قـام الشجـاع وعدّهـا كبـوة حـصـان
واحيّـا بلـد كانـت خــراب وقتيـلـه
يـا عـلّ قبـره روض جنـه وبسـتـان
وعسـى كتابـه فــي يميـنـه يشيـلـه
وعسى العوض في أميرنـا عالـي الشـان
ويجبـر مصـاب قلوبنـا فــي بديـلـه
ونبايـعـه بالـحـب قـايـد وربّـــان
دام الاصيـلـه للـشـيـوخ الاصـيـلـه
وتبقين يا كويـت الرخـا عبـر الازمـان
درة خلـيـج ودار خـيـر وفضـيـلـه





. ( . جابر العثرات . ) .



* .











يـا الـردي علـى الـردى مثلـك يشيـب
تكـبـر ويـكـبـر رداك وتمـتـلـي ..
الجهـل مـا عالـجـه طــب وطبـيـب
ذا بــلا.. والله يـعـيـن المبـتـلـي ..
باتغاظـى عـنـك واتحـاشـى واغـيـب
عـن شعيبـن عافتـه قــدم جمـلـي ..
مانـي مجبـورن اعيـشـك كالنصـيـب
لا انته من ربعي ولا انتـه مـن هلـي ..
واعرف ان ( ضيقي ) على شرواك طيب !!
واحسـب احسـاب المعانـي و زعلـي ..
جابـك الله وهاجـس المعـنـى قـريـب
انتهـض شعـري وانـا مانـي خـلـي ؟!
عنـدي فكـرة بيـت مــا ودي تخـيـب
ولّعـت قافـي.. وعـانـه يصطـلـي ..
وانـت هالمـره ابـي تصـبـح لبـيـب
افهـم احسـاسـي وتـرجـم ( مايـلـي )
الذيابـه مــا تـخـاوي كــود ذيــب
و ( الثعـل ) شـرواك عنـه تعتـلـي ..
فـلا تحـاول تعتبـر نفـسـك صحـيـب
لان هالصحبـه تـرى عيبـن عـلـي ..
ذاكـرك ضيقـي مـع اللـيـل الكئـيـب
ولا تظـن ذيـك السحـابـه تنجـلـي ..
خلهـا علـى الولـي .. والعيـب عـيـب
واسترح وارتـاح .. يـا عبـد الولـي ...
و كان ( رمياتـك ) مـع غيـري تصيـب
فعرف ان العيب ما يصيب ( سهلـي ) . !





. ( . العيب ما يصيب سهلي . ) .



* .












راكـب اللـي ورّدوه البشـر والجفّالـي
من ديار ٍ تكـره المسلـم وديـن اسلامـه
بانورامـا ( s 500 ) ورد مـن تـالـي
الجوانـب إنسيابيّـه .. وسقفـه جامـه !
صوت دقة سلفه ان دقه عريـب الخالـي
غصة اللـي تـوه يعلّـم بحكـم اعدامـه
وان مشى بشويش كنه فـارس ٍ مختالـي
رزة الفـارع وهيبـة شيخنـا العـلاّمـه
خشته .. خشة هنـوف ٍ سببّـة غربالـي
فاتنة جيل : ( العباه مخصـره و لثامـه )
من حلاها الصايـم اليـا شافهـا طوّالـي
يستشك انه جرح فيمـا يشـوف صيامـه
كن كبوته خـدود الخشـف بنـت الوالـي
ودّك انهم صممّوا لـه فالوكالـه شامـه !
وكن بين عيونه اليا منـه صـار قبالـي
عربجي ٍ نكّس عقالـه علـى مرزامـه !
والسِكن (أجواء حانه) وان عطاك العالي :
شفت برج المملكه لوّنك غـرب تهامـه !
امبراطـور الرفاهيّـه بــدون جـدالـي
رحلة استجمام .. مـن صدامـه لصدامـه
داخليّه يـا بـري حالـي ويـا عزّالـي
أرض خصبه .. للفقير ودمعته واحلامـه !
كل حاجه فيه ( عاج ) من الشوائب خالي
نوع فاخـر فالمواتـر نـادر استخدامـه
وبين : سيتـه المريـح وقيـره الميّالـي
وشاشتـه والنـور والجـوّال والرزنامـه
وفلسفـة طبلونـه المتناسـق الطـوّالـي
من اضاءته الخفيفه لزيـن رسـم ارقامـه
تشعر بمتعة جنون ( الدوري الايطالـي )
بنجومـه وانديّتـه وقـوّتـه وإعـلامـه
وفالدركسون اختصار السالف !! وبالتالي :
سايقه يعطـي الاوامـر كلهـا بابهامـه !
( مرسدس) وصيّـة الاجيّـال للاجيّالـي
( الملـك ) وماتبقـى جُـنـده وخـدّامـه
منوة اللي يركـب الغالـي لعيـن الغالـي
لا نوت شوفـة ربوعـه نفسـه الجزّامـه
وجّهه على الرياض وثم عطـاه الصالـي
وفز فـزة مـن توفـى شايبـه قدّامـه !
(نصف ساعه) عقبهـا ييغيّـر الارسالـي
وعقبها (باربع) يغنّي مرحبـا يـا ثمامـه
ناصي ٍ من يستحق المـدح واسترسالـي
( سعد المشعان ) درع المبتلـي وحسامـه
شيخ ٍ ليا قالوا اسمه والشعـر فـي بالـي
تبرك جزال البيوت الشرد تحـت اقدامـه
الشجاع , الشامخ , الحر , نادر الافعالـي
الوفـيّ اللـي غرامـه بالوفـا وهيـامـه
الكريـم اللـي يمينـه كفـهـا همّـالـي
غاية اللي جرّح وقطّـع جمـاه حيامـه !
طيبه وفعله وصيتـه مضـرب الأمثالـي
هو علمنا .. لا تحاكوا فالكـرم وأعلامـه
كنْه يقول : الطيب ثوبي والحميـاّ عقالـي
والشموخ عمامتي .. يا حيّها من عمامـه
الرجوله على جسمـه فصّلـت تفصالـي
هندم علوم المراجـل واصبحـت هندامـه
من زبنه من الزمـان الشيـن والأهوالـي
والله ان يبطي زمانه مـا قـواه وضامـه
سعد عين اللي يعده صـدق راس المالـي
وسعد عين اللي غدالـه مسنـده وحزامـه
وجعل يفـداه البخيـل الناقـص المتعالـي
شايف ٍ نفسه على الدجه .. حبيس اوهامه
عند روحه هو الاطيّب !! جعل ماله والي
وعند خلق الله : عفن ومهايطي وهلامـه !
والصحيح اللي غبـن حسّـادي وعذّالـي
بيـت ٍ يفطّـر كبـود العالـم النمّـامـه
والله ان ما يستحـق المـدح واسترسالـي
غير ابو مشعان ابن عمي رفيـع الهامـه







. ( . بـــــانوراما . ) .



* .











ليت ما خانت دموعي بيوم كبـري والمحاجـر
وانكشف لك ضعف عاشق عذبـه وقـتٍ عنيـد
كان يمكن ما تمادي بي غـرورك يـا مهاجـر
ورحت عني واثقٍ في قلـب تبقـى بـه وحيـد
قالوا الفرقا خطيـه واشهـد ان الصـد فاجـر
يـوم زوّد فـي ذنوبـه وابعـدك عنـي بعيـد
آه يا كبر الجروح إن صارت طيوفـك حناجـر
ويـن مالـد بعيونـي تـزرع بهمـي وريـد!
يعتليني صمـت كافـر وتساقـط بـي خناجـر
زغردي يا عيون همي انقتـل صـوت شهيـد
فاضت الذكرى في بالي فيض زمزم بيد »هاجر«
وارتوى من زمزمك شوقـي ولا حصلـت ايـد
كيف احصّل دامي أفقر عشق والحرمان تاجـر؟
يشتري ويبيع في جرحي وأنـا اتناثـر قصيـد!
كبرها لا غاب منهو صار فـي دنيـاك حاجـر
على كل احساس فيك وعشـت تذكـره وتعيـد
ليت ما خانت دموعي بيوم كبـري والمحاجـر
ورحت عني واثقٍ في قلـب تبقـى بـه وحيـد





. ( . آه يـا كبر الجروح . ) .




* .












الكلام احيـان مـا منـه ثمـره
خلّني ساكت وسـوّ اللـي تبـي
ضيّق الخاطر كلامـك وكسـره
آه .. من كسر الخواطر وتعبـي
واعـد الجمّـال فالبـال عشـره
كلهم مـا حققـوا لـي مطلبـي
والقصيد إن مـر ليلـي وسهـره
احطب ضلوعي و اوّلع فحطبـي
مختلف فكر وشعـور وحنجـره
أخطف الألباب واسبيهـا سبـي
والعفو ( توبيخ ) عنـد المقـدره
مير ماش عراش في راس الضبي
صاحبي يا صاحبي لـو اخسـره
مستحيـل إن الخسـاره بسببـي
الغبي منهـو يصـدق لـه مـره
والمره ما تصدق الا مـع غبـي
علّمـه لا يزعجـك بالثـرثـره
عبهلـه كـذاب ومحمـد نـبـي
لا يحسبّهـا كــذا بالمسـطـره
فرق بين الأعجمـي واليعربـي
كم قبـر ٍ فـي قبـور المقبـره
يحفره شايب ويدفن بـه صبـي
وكم رجل ٍ شاف شـي ٍ يقهـره
من ولد عمه على شـان اجنبـي
وكانهـا مابيـن ذنـب ومغفـره
لحيتـي تكـرم وكرّمـت شنبـي
الكلام احيـان مـا فيـه ثمـره
خلّني ساكت وسـوّ اللـي تبـي






. ( . مختلف . ) .



* .














جعل قاعك سيـل يـا شـرق المنامـه
فيك من حببني ف( ييبه ) و ( كاهـي )
أكحـل ٍ طرفـه رفـع سـوق اللثامـه
مرثع ٍ فاللي سهى فـي طـرف ساهـي
أتلـع ٍ فآخـر طـرف شفتـه شـامـه
شوفهـا مصـدر تـوجّـادي وآهــي
نافـر ٍ صـدره إليـا وقّـف وزامــه
كنك توايـق علـى ابريقيـن شاهـي!!
قاطعه قد لي سنه ؟! أبـي السلامـه !!
اتلهـوى ولا انــا مانـيـب لاهــي
خايـف ٍ مـن وقفتـي يـوم القيـامـه
يـوم مـا تنفعنـي فلوسـي وجـاهـي
يالله انــك لا تلحـقـنـي آثـامــه
طالبـك عفـوك ولطفـك يـا آلاهـي
( مَثـل الدُنيـا ) مثـل كفخـة حمامـه
كلمـة ٍ مـن بـادي بتوصـل لناهـي
ويا خـذ الإنسـان مـن دنيـاه خامـه
وما فعـل حسـب الأوامـر والنواهـي
ويـا مروّجـة النميـمـة والرخـامـه
فالصحافـه والمجـالـس والمقـاهـي
لا تعبتـوا يــا منـاديـب النـدامـه
علمكـم ضايـع وراع العلـم فـاهـي
قـد خذيـت ابلـه وزاده مـن خيامـه
والحبيـب يخطـط وينـوي شياهـي !!
غير يبطـي عظـم وبتبطـي عظامـه
مـا قـوت تمشيبـه دروب الـدواهـي
لـو صنعتـوا بوصلـة عـز وكرامـه
إتجـاه البوصلـة يعـنـي اتجـاهـي
النهـر جـاري و يـا قـوّ احتـدامـه
والمنابع مـن فضـل ربـي كمـا هـي
كـل صاحـب ذايقـه يشكـي حيامـه
يارد ويشـرب ويـروى مـن مياهـي
شاعر احساسي فكر !! وأرضي غمامه!!
واكثـر الشعّـار مـا شـد انتباهـي !!
يفـرض ابداعـي وقـاره واحتـرامـه
بين زحمة موضة الشعـر الفكاهـي !!
مـا خذيـت مـن البعيـر إلا سنامـه
ولا تركت مـن الثقـة غيـر التباهـي
اعرف الرجـال مـن منطـق كلامـه
وافخـر بعقلـي واماريبـه واضـاهـي
ما زهـى راس الزعيـم الا الزعامـه
والمواقـف زاهيـه والـراس زاهــي
فـان بغيتوهـا شـعـر ولا ّ وسـامـه
والله انـي فـي كِـلا الثنتيـن راهـي







. ( . المنامه . ) .



* .











مـرات احـس القصـيـد بــدم شريـانـي
يضخّـه القلـب ليـن يقـولـه لسـانـي . !
وانـي كتبـت الغـريـب الـراقـي الـنـادر
وانـه خلاصـة علـوم الفكـر الانسانـي . !
ومـرات احسّـه شـي لا يمـكـن آصـلـه
وان الصحافـه .. مجـرد مـدح مجانـي . !
واني ليا من قريـت ( لعافـت ) و ( مدغـم )
زهـدت فيمـا كتبـت وشابـت الحـانـي . !
لكّـن واللـي خلقنـي غيـر عـن غـيـري
إنـي أحبّـه واعـده ثـالـث اخـوانـي . !
لـذا يـا شعّـار جيـل ( الكـل متمـكـن )
والكـل مبـدع .. و متميـز .. و فنانـي . !
أخـذو حقيقـة مشـاعـر شـاعـر ٍ منـكـم
* وجهة نظر * والصراحه .. نبض قيفاني . !
المسـألـه كلـهـا .. فـكــره وقـافـيّـه
وأبيـات مسموعـه مـن فـلان و فلانـي . !
نفس العتب .. و الغزل .. واللي قبـل افضـل
ونفس الفخر .. و اطيّب العربان .. عرباني . !
نـقـول شــي ٍ يقـولـه غيـرنـا لـكـن
الفـرق بالحبكـه .. و توقيـت الازمانـي . !
يعنـي بـلاش انتظاهـر ( بالأنـا ) واجــد
ما فيه ( ابو الطيب ) ولابـه ( لويحانـي ) . !
مانـي بعمـم !! ولكـن اغـلـب الاغـلـب
مستشعر .. مهايطـي خلقـه .. وقومانـي . !
لـو انــه يعـاتـب الرعبـوبـه الحـلـوه
يقـول ياطيـب ابـوي وطيـب جـدانـي . !
ومـدام هـذي حقيـقـة وضعـنـا الـراهـن
يمكـن مـع الوقـت رب البيـت يبلانـي . !
فـإن كـان شفتـوا اهياطـي يـا جماهيـري
تجاهلـوا كـل اشرطتـي .. و ديـوانـي . !
خلونـي احــس فــي قيـمـة تواجـدكـم
واتعـب علـى ذوقكـم كـان الله احيانـي . !
لكـم علـيّ اقلـب الدنـيـا عـلـى شـانـه
والـي عليكـم تحبونـه عـلـى شـانـي . !
وعلـى العمـوم الغريـب احساسـي الليـلـه
ماهـوب باحساسـي ان فارقـت شيبانـي . !
عوايـدي لا تركـت ديـار ( اخـو مريـم )
أشعر بضيقـه واحـس الشـوق أضنانـي . !
لكـنـي الـيـوم كـنـي جـالـس فبيـتـي
مابين ربعي .. و خلانـي .. و صدقانـي . !
فيا أمـا * الكويـت * موجـوده هنـا معنـا
يا أما دار الخفوق ديـار * ابـن ثانـي * . !
أحبّهـا مـن قبـل لاجيهـا وامــوت بـهـا
واحسّهـا غيييـر فـي فكـري ووجدانـي . !
واللـي مــزوّد غـلاهـا شعبـهـا كـنـه
يعـطّـر الارض كمـبـودي وريحـانـي . !
من كثر ماهـو ودود .. و سمـح .. و يقـدّر
ماكنـي بضيـف كـن الشعـب ضيفانـي . !
والــدار تـبـارك الرحـمـن مـــا شالله
دره وفيهـا الجمـال اشـكـال والـوانـي . !
هنـا التطـور صحـيـح بكلـبـوا حـاجـه
رياضي .. و فكري .. و فني .. و عمراني . !
الله يبـيـض وجـيـه شـيـوخ ديـرتـكـم
يشهـد لهـم قاصـي العربـان والـدانـي . !
في ضـل قايـد مسيرتكـم * ابـو مشعـل *
و عياله .. و عزوتـه ذربيـن الايمانـي . !
امجادكـم مـا هــي بسهـلـه و حــي الله
لا والله الا بـحـد السـيـف شـامـانـي . !
ويكفيكـم مـن المآثـر .. موقـف الخفـجـي
يـوم الجمـوع اتداحـم فعلـكـم بـانـي . !
وعمـار يـا ديــرة التـاريـخ والطيـبـه
في ضل شيخك ( حمد ) وامجاد ابن ثانـي . !





. ( . وجهة نظر . ) .




* .














تقـدم الدنيـا لنـا درس ٍ جديـد بـكـل يــوم
والناس تسلم من غثا الدنيـا بحفـظ دروسهـا !!
وعلى حسب حفـظ المواجيـب وتعاليـم السلـوم
نعـرف مقاسـات البشـر بالمرجلـه ونقوسهـا
صيت الرجال الوافيّـه بأفعالهـا .. ولا ّ الرخـوم
ينبيـك عنهـا : قـل نفعتهـا وشيـن نفوسهـا
تطرد ورى الدنيـا وتكشـخ بالمواتـر والهـدوم
مثل ( الحريم ) أغلب دراهمهـا علـى ملبوسهـا
والإمعـه والشايـب الكـذّاب وضعيـف العـزوم
ناس ٍ مع العالم بـلا هيبـه تدربـي روسهـا !!
والبخل : خلاّنـه بهايـم !! لا تسـام ولا تسـوم
لا شفتها ترفـع يـدك حمـد وشكـر وتبوسهـا
على الصحن هم أول الجلاّس وآخـر مـن يقـوم
يعيّفـك حلـو الاكـل والشـرب طـول جلوسهـا
ماهيـب للـلازم سنـد ولا ذخـر عنـد اللـزوم
تمـوت ماسـرّك مهايطهـا وكـثـر فلوسـهـا
وسوالف الخبلان .. رفعة ضغط وصداع وهمـوم
فـلاوة ٍ تخطّـف علـوم الـعـرب وتحوسـهـا
واجب عليك إليا حكت عن جملـة حكاهـا تشـوم
الهند مـا يـرأس حكومتهـا سـوى هندوسهـا
وربع المصالـح والمجامـل خـوة ٍ ماهيـب دوم
اقولهـا والتجربـه قطـع وريــدي موسـهـا
وقت الرخا .. مثل الصقور اللي على المرقب تحوم
فيّ ٍ يـذّري ساقـك الرمضـا وحـر ّ شموسهـا
وإليا احتمت صكّات بقعا وامست علومـك علـوم
اتلـوّي خششهـا وتجحـد خوّتـك وتدوسـهـا
من عقب ما انت الطيّب وقدرك معـزّز ومحشـوم
تصيـر اردى مـا خلـق ربـي ودم ضروسهـا
أبعد عن الأشكال ذي .. بعد الثرى عـن النجـوم
وش حاجتك في قرب رديـان العـرب ونجوسهـا
ماهوب عيب إليا عزموك تقول يالربع .. معزوم !
العيـب : لارحـت لعزايمهـا وجيـت عروسهـا
وخلّـك فطيـن تعلّمـك دنيـاك درس بكـل يـوم
والرجل يسلم من غثا الدنيـا بحفـظ دروسهـا !!






. ( . التجربة . ) .


* .




يا سيـدي .. راشـد بـن عبدالعزيـز آل السعـود
الله يبيّض وجهـك .. ويكفيـك مـن شـر الحسـود
لله درّك .. عمـر وانـجـازات وفـعـول وجــدود
وعز الله انك مثـل ابـوك .. افكـار واراء وجسـد
سيّد شباب الارض في وقتـك .. ووقفاتـك شهـود
سيادة بجمع الـدررّ ماهيـب مـن (فـرّق تسـد )
على صغـر سنـك تجـاوزت الصعايـب والسـدود
عدّيتها من طيب راسك .. كل ابوها .. سد .. سـد !
مديت لاصحابك حبل ( من رحمه وفزعـه وجـود )
وسحّبت عدوانـك بفزعاتـك بحبـلٍ ( مـن مسـد )
درّبـك مـن رام العُـلا .. مواقـف وعـز وخلـود
ومن جاور الصالح صلح .. ومن جاور الفاسد فسد !!
وماهـي غريبـه لا تفرعنـت وتقدّمـت الحـشـود
أبوك من قبلك .. و ( هذا الشبل مـن ذاك الاسـد )





. ( . راشد بن عبدالعزيز . ) .






* .














ياللي تحد قلبي علـى أقصـاه
ماعاد بي حيله على الضيـق
وقت الردى كل شـي سـوّاه
رخومـه تــذم المطالـيـق
ماعاد اطيـق الهـم وأقـواه
شلت بشبابي فوق مـا اطيـق
ذي آخـر أحوالـي وطـرّاه
يومك تقول إن كنـي طويـق
إيـه والله إن فينـي مزايـاه
وإن بينـي وبينـه مواثـيـق
بس صاحبـك ماجـاه كفّـاه
مليت من قولة (( توافيق )) !!
حتى الشعر شكلـي أبظمـاه
ماعـاد تغـري بلّـة الريـق
كانـت معاليـقـي تمـنّـاه
واليوم !! هو جرح المعاليـق
يطري علـي واقـول عـزاه
يانشـوة الفرحـه ابتصفيـق
واطري عليه ان تاهت اخطاه
يلمحنـي بـروس الشواهيـق
حتيـش لـو إنّـا حشمـنـاه
ماتـردع الحشمـه مطافيـق
في ذا الزمـن ماتـت بقايـاه
روح امسح دموع الطواريـق
غنّى لك اللي متعـب اغنـاه
لاجـر صوتـه همّـه يفيـق
لايكتب الضحـك ولا يقـراه
كنه لحـزن القـاف عشّيـق
بتصدق شعوري !! أو إنسـاه
بصرك ترى ما احتاج تصديق
قد قلت لك واوصيتك وصـاه
لاتنبش جروح المخاليـق !!
هالقلب لاتحده علـى أقصـاه
مالك ومال الهم والضيـق !؟





. ( . الضيق . ) .







* .














قصايدٍ تنكتب في روّعة وصوفـك
في كل خايع فكر تلقى لهـا جِـرّه
والشعر كانه قدر يخطّرك ويطوفك
مـا هـوب لله .. لا درّي ولا درّه
يا غايب ٍ رجّعك عقب البطا خوفك
في كل مره تجي وتعـاود الكـرّه
اتكبّر العذر قبـل اتكثّـر حلوفـك
ولا ضرّ قلبي كبر عذرك ولا سرّه
قلبي نسيته سنه في راحت كفوفـك
طالبك ردّه علي ولاّ اكفنـي شـرّه
الله لا يسامح الاشـواق وطيوفـك
ويا ويل قلبي من الحرمان والحرّه
يا ليتها في يدّي واغيّـر ظروفـك
او ليتني ما عرفت الحب بالمـرّه
العام في كل لحظه اقـدر اشوفـك
واليوم ما اقدر اشوفك بالعمر مرّه !








. ( . راحة كفوفك . ) .








* .















ادهم الليل موحـش دون خـل وخديـن
وابتلانى فـي ابوشيبـه وانـا ماابتليـت
مير يامدغـم انصـت للكـلام الثميـن
ودي ارثيك قبل تموت فـي كـل بيـت
اربـع ايـام والهاجـوس بينـى وبيـن
لـذه النـوم والاحـلام وارض المبيـت
وليلة البارح اقسى مـن جفـا الوالديـن
بعدهـا مافرحـت وقبلهـا ماشكـيـت
علمونـي بموتـك وأنقطـع الاكسجيـن
وضاقت ضلوع صدري وأختنقت وسريت
جيت أودع محيا وجيـت اقبـل جبيـن
جيت ليتك تشاهد حالتي يـوم جيـت..
يـوم أشوفـك قـدم صفيـن متساوييـن
لابسٍ بشت عرسك وأسترحت وغفيـت
وجهك اطهر من احساس ودعا الخاشعين
ومثل بسمه حجاجك يومهـا مـا رأيـت
وجثتك ترتفع مـن فـوق غيمـة يديـن
جادت بغيث دمع عيوننـا وانـت ميـت
ياولـد عـم كـل ذره بجسـم الحزيـن
والله انـى قبـل لا افارقـك ماهقـيـت
بانه بامكان دمعي يجعـل القـاع طيـن
لين ماجيت قبـرك وانكسـرت وبكيـت
جعل منزلك منـزل الاتقيـا الصالحيـن
وجعل تغفـر ذنوبـك كلهـا كومبليـت





. ( . مرثية مدغم . ) .








* .


















يالله ياعالـم خفـى الانفـس ومـاكـن الضمـيـر
تشكـي عليـك الخلـق بلواهـا وقــوّ آلامـهـا
ياللـي عبـادك تحـت ظلـك تستظـل وتستجيـر
مـن حـر شمـس ..عيوبهـا وذنوبهـا وآثامـهـا
نلوذبـك عـن شـر بقعـا اللـي رحاهـا تستديـر
ونعوذبـك مـن فتنـة الدنيـا وســوّ اوهامـهـا
تغرّنـا فـي غيّهـا والعمـر مـحـدود وقصـيـر
ومـارد الانفـس للقبـر مهمـا تـطـول ايامـهـا
بشـر ويجذبنـا لتكـرار الخطـا سلـك الحـريـر
نورك مُبين ومـن جهـل نشفـق علـى ظلامهـا!!
ولاينفع الإنسـان فـي اليـوم العبـوس القمطريـر
إلا فعـول الخيـر فـي دنيـاه كــم ارقامـهـا؟؟
يـارب.. وفقنـا وسهلـهـا ولاغـيـرك نصـيـر
لاغرغـرت روح البـنـآدم وبلـشـت بانسامـهـا
يامفـرج الكربـات و الضيقـات والامـر العسيـر
فزعتك قـدام القلـوب تمـوت بيـض احلامهـا!!
جمّلني في عين الصغيّـر مـن قبـل عيـن الكبيـر
وساعـد اهجوسـي ابمعانيهـا وحسـن الهامـهـا
من دار اخو مريم عنيـت احـث رجلـي للمسيـر
جيـت لطحاطيـح الرجـال و وقفـتـي قدامـهـا
ودي بها !! في وضع ماهو نفس هذا الوضع !! مير:
لأيامـنـا دوراتـهـا ولـلـظـروف احكـامـهـا
سلام ياهل الطيـب والنامـوس والسيـف الشطيـر
يانسـل سـادات العـرب وابطالـهـا واكرامـهـا
ياهل القنا و اهـل الثنـا والعـز والمجـد الوفيـر
يـالابــةٍ مـقــام راس النـايـفـه مقـامـهـا
بقوم .. روس القوم .. والامجاد في فـيّ وهجيـر
عنـوان عـز الجيـره وسقـم الـعـدا وكعامـهـا
(ظهور السواني) معلمين التـرك معنـى زمهريـر
جحـافـلٍ قدامّـكـم شـكـت بــرود عظامـهـا
اليا رضيتـوا كـن لسنيـن الزمـن وجـهٍ سفيـر
واليـا زعلتـوا تزعـل ايـام الزمـن واعوامـهـا
وسلام يالسميان ياهـل الخيـل والصيـت الشهيـر
صفـوة مياديـن الوغـى لاثــوّرت بأعسامـهـا
آلاد سامـي .. منبـع الطـالات لاصـاح النـذيـر
ستر الهنوف اللي تعـزوى فـي فعـل ضرغامهـا
اليا ركبـوا قـبّ المهـار ودكّـوا الجمـع الغفيـر
تبـرك زحازيـح الرجـال وتعـلـن استسلامـهـا
لابة شرف .. من يعترضها بالـردى ماهـو بخيـر
مـن طيبهـا ضامـت زمـان الشـده ولاضامـهـا
اليا عطت كنها تغرف مـن جمـة البحـر الغزيـر
واليـا خـذت قـادت ذلـول الكايـده بخطامـهـا
يامعتقـة دم الدخيـل .. مجبـرة عظـم الكسـيـر
انتـوا خـوال المرجـلـه والطايـلـه عمامـهـا
تكفون يارجـال الكـرم فـي جـاه الاول والاخيـر
تمّـوا طلبـنـا يامقابـيـس الـوغـى واعلامـهـا
تكفون يـاروس الرجـال اللـي تشـور وتستشيـر
ردّوا علـى أم اليتيـم اغـلـى واعــز ايتامـهـا
تكفـون يانطّاحـة القالـه هـل الخـيـر الكثـيـر
تجمّلـوا فـي اللـي حضـر عوامهـا / حكامهـا
تكفى يافيصل تمّهـا فـي يديـك تحديـد المصيـر
نـاسٍ تبـي الجنـه علـى هـذي تحـث اقدامهـا
يابـو سنـد مـال الكبيـره كـود رجـالٍ كبـيـر
ومثلـك سنـد للمعضـلات وشيخهـا وحزامـهـا
تكفى عسى ينساق لـك مـن جنـة الخالـق بشيـر
يعوضـك الله بالجنـان الخـالـده .. واختامـهـا :
قل تم .. تكفى ياسليـل المجـد والصيـت الشهيـر
رجّـع علـى أم اليتيـم اغلـى واعــز ايتامـهـا






. ( . ظهور السواني . ) .







* .


















أصعـد ( المشـراف ) يـا شعـري وذبّـه
أنـت اكبـر مـن محيـطـه وارتفـاعـه
مركـبـك هبـايـب افـكـاري تـهـبّـه
و( البحـر ) ميّـت علـى فلـة شـراعـه
و( السمـا ) تشتـاق لـك شـوق الاحبّـه
لانّــك تحـجّـم فضـاهـا واتـسـاعـه
خـش تقصيـري !! عـن عيونـي وخبّـه
خلّنـي كامـل مـع التفكيـر .. سـاعـه
ليـن اسـوي منـك : دافـع للمسـبّـه !!
لكـل فـارغ ودّه : يـمـارس ضيـاعـه
اشهـد ان بعـض الشتايـم .. مستحبّـه !!
الدلـيـل القـاطـع لطـيـب البضـاعـه
يـا تعـب حالـي ويـا حـالـي وطـبّـه
والله ان كنّـك اخـوي مــن الرضـاعـه
اتنـومـس فـيـك وانــوّه وانـبّــه :
انحـدار الطـرح فـي جيـلـي إشـاعـه
أعشقـك .. ومخالـفـك ربــي وربّــه
بيـنـي وبيـنـه مجـافـاه وقـطـاعـه
الكـراهـيّـه ضـريـبـه للمـحـبّـه !!
فلسـفـة شـاعـر وتوظـيـف لقنـاعـه
كـل شـي ٍ نكـرهـه عكـسـه نحـبّـه
مثـل كـره الخـوف حبـا ً بالشجـاعـه
جـايـز اربــاك العـقـول المستتـبّـه
بالـدهـا و العنجهـيـه واللـكـاعـه !!
مير قلب الشعر : ( غصـن ٍ ) مـا لعبّـه
غيـر ( نسنـاس ) الرقـي والاستطاعـه
يـا أولـي الألـبـاب والإبــداع لـبّـه
في اكتشاف ( الدارج ) و ( حُسن ) اختراعه
والأكيـد : ان الـدرّر فـي كــل غـبّـه
وكـل ٍ ونسـبـة ذكـائـه واطـلاعـه !!
والمهـم : مـوت النهـر فآخـر مصـبّـه
النـهـايـه المنطـقـيّـه لانـدفـاعـه !







. ( . فلسفة شـــاعر . ) .








* .



















أمسيه واعلام واضواء وصحافـه
وانـا لاوقفـت مابينـي وبينـي !
اتساقط ضيـق واحبـاط وحسافـه
كني اخنق حلم عمري في يدينـي !
واتسامى فكـر واحسـاس وثقافـه
واكسب التقدير والاعجـاب فينـي
يا طويل الحزن والواقـع خرافـه
كذبةٍ ماهيـب تسلتطـف يقينـي !
ليـه مااغنيّـك تحنـان ولطافـه ؟
وانت نبض الروح وانفاس تحكيني
ماتهز الريـح غصـنٍ لارتجافـه
ينكسر صوتي ! وتستاحش يميني !
كل مامر المسـا صـدري وحافـه
قلت له والشمس مشرقها جبينـي :
من مشت رجله على درب السخافه
طاح من عقلي قبل قلبـي وعينـي
الرجل لاصار مابـه ديـن : تافـه
والعدو لاصار يعجبنـي : خدينـي
والفشل لاصرت ترضى بالوصافه
وانـت قـادر تستبـد وتحتوينـي
وكان انا من لاربـط فعلـه بقافـه
جعل تبكيني عيـون اللـي يبينـي
وجه صبـحٍ مـن حيـاه وعفافـه
استحي من طيف زوله لو يجينـي
نهر سكر مـن ضفافـه لاضفافـه
اغنيات الملـح وانشـودة حنينـي
ناسي النسيان !! طبعـه واختلافـه
واصبح اللي راح واللي يحترينـي
عاشقه .. وقف هنا والعمر طافـه
هو متى يرجع وترجع لي سنيني ؟!
الفراق .. شعور من شـدة جفافـه
يبذر عيوني !! ويقطف دمعتيني !!
القلـوب تعـاف طاريـه وتخافـه
يعتريها شئ .. عانـه يعترينـي :
كلبوي طعـون واحـزان وكلافـه
لاانتهاني جـرح الآخـر يبتدينـي
ليت حظي مارمى عمري خلافـه
ولا ترك لي تمتمة وينه ووينـي ؟!
وليت مابيني وبينـه مـن مسافـه
مثل مابين السهر وجفون عينـي !!






. ( . نهر سكر . ) .









* .

















يـا قـاف لاتزعـل علـي لـو زاد لـومـي حبّتـيـن
شاعـرك ذي ثالـث سـنـه قصيـدتـه مــا قالـهـا
غيّبتهـا عنـي وعـذرك لاحـشـى مـاهـو سمـيـن
سـوق المعانـي سوقـهـا واتــرك عـلـي موّالـهـا
محبوبتـي ماهـي بتستاهـل كـذا ! يـا اغلـى خديـن
ان مـا سعـت لـي بالشعـر غصـب ٍ علـي اسعالهـا
الـدّره اللـي لـو يعذربهـا ( جمـوع الحاسـديـن ) ؟
مـا عـذرب عـذوق العنـب غيـر الـذي ماطالهـا !!
مـن عادنـي وسـط المهـد وهـي سقتنـي باليمـيـن
فنـجـال حــب ٍ لا رشفـتـه زاد حــب دلالـهــا
مـرت سنيـن وحبّهـا يكبـر علـى مــر السنـيـن
ونـذر ٍ علـي لامـوت مـاهـزت يــديّ فنجالـهـا
من وين ببدى يا شعر ؟ يا وين بوصل بـك يـا ويـن ؟
وانـا اقتنعـت انـي بقصّـر قبـل اعــدّ خصالـهـا
الترفـه اللـي زينهـا طـاف وتـعـدى كــل زيــن
مـا تشـبـه الا غيـمـة ٍ احـلـى الشـهـد همّالـهـا
الظفـره اللـي بالقسـى تصـمـل ولا يمـكـن تلـيـن
تشهـد لـهـا وقفاتـهـا .. تشـهـد لـهـا افعالـهـا
مجـرّبـه واداحــم التـاريـخ بالجـنـب المـتـيـن
لانـهـا اذا جــت للـكـرم !! متـفـرّده ولحالـهـا
وان قلت منهي ؟ قلت لحظه ! لجل ارفـع لـك ( جبيـن
كـل الحكـي ) و انطـق لـك اسـمٍ شلّتـه واشتالـهـا
ذي دار ( اخو مريّم ) عريب الجد والحصـن الحصيـن
ذي عيـدي اللـي كـل يـوم يـهـل فــيّ هلالـهـا
هـذي الكويـت وخـل فـراغ وحـط بعـده نقطتـيـن
واكتـب ( عـبـاره ) تعتـبـر وصـيـة ٍ لاجيالـهـا
( اكبـر نِعـم رب العـبـاد انــه خلقـنـا مسلمـيـن
وانـه جعـل الكـويـت ديرتـنـا وحـنـا عيالـهـا )
دار السـلام اللـي تـحـب انّــا نـكـون مسالمـيـن
لانهـا اذا ضاقـت تعـرف شلـون فـعـل ارجالـهـا
في كل صبـح وبحرهـا يحكـي لـك بشـوق وحنيـن
عن هيّـة ( الرقـه ) وكيـف المـوج ( قبّـل ) جالهـا
و ( القصر الاحمر ) علم الاجيـال وش معنـى عريـن
دامـه يعبـر لـك عـن ( الجهـرا ) وفعـل ابطالـهـا
تاريخ .. والتاريـخ يحفـظ .. واسمعـوا يـا الطامعيـن
ذي دارنـا .. وآمالنـا ..واحوالنـا .. مــن حالـهـا
انحبّهـا والطـق مـا ينـفـع بـكـم يــا الميتـيـن
مير اقصروا شر ( العجوز ) اللـي ( تبـث ارسالهـا )
مهمـا حكيتـوا وابتليتـوا ذي عجيـن و ( ذيّ ) طيـن
يعنـي علـى قـول المثـل : فــال الله ولا فالـهـا !!
ميـر الله الله بالفلـس يـا اهـل الفلـس يـا المفلسيـن
لا وآخـاسـرة كـدكـم .. والخـيـل مــن خيّالـهـا
وتبقيـن يـا دار السـعـد مـدهـال كــل الطيبـيـن
فـي ظـل مـن لا عقدوهـا قــال : انــا حلّالـهـا
نعم ( الامير ) ونعم ( الارض ) ونعم يا ( الشعب الامين )
ولاهـنـت يـاقـافٍ تجـمّـل بــي قــدم موّالـهـا
ويالله حـقـق مطلـبـي مــدام هـمـي حاجتـيـن ؟
( اموت مـا جاهـا ضـرر ) وان ( اندفـن برمالهـا )





. ( . الكويت . ) .








* .
















من منطلـق مـا ينمـدح غيـر الكبيـر ابـن الكبيـر
بـسـم الله الرحـمـن ياقـافـي وبـسـم الله عـلـي
سلام .. ياتاج الفخر .. من خافق .. و راس .. و ضمير
تحيَـه تليـق / بمقـامـك / يــا رفـيـع المنـزلـي
يا سيدي ( حمدان ) يا ابن الشيخ .. و بناخـي الأميـر
الشعـر يسمـو فـي / سمـوك / و المعانـي تعتـلـي
أخطر محطات الشعر .. مدحك .. و أنا شاعر خطييـر
جيت اكتب .. اللي ما انكتب .. وأفكار شعري .. تصطلي
يـا سيـدي / قناعتـي / مـن عادنـي طفـلٍ صغيـر
إن ( الله الوالـي و لا غـيـر الله الـوالـي ولــي )
يعني على الفطرة .. إحاسيسي .. و لا أحـب استشيـر
عفويتـي تشـرح طبيـعـة آخــري قـبـل أولــي
حبك من الله و القصيـدة غيـر فـي * فـزَاع * غيـر
يهلّهـا صـدري مثـل / وبـل السحـاب / المنـزلـي
و تربع فياض الخفوق .. مـن الغـلا .. الجـم الكثيـر
و يسيل وادي / حشمتـك / وسـط العـروق و يمتلـي
و بيوتـي اللـي تنكتـب / كـل مـن الثانـي / يغيـر
يتسابقـون لمسمعـك .. لأن مسمعـك مالـه .. حـلـي
الأول / يغيـظ الثانـي / الثانـي يناظـر / بالأخـيـر
و يعتبـر لأن الأخيـر / بغيـرتـه / يغـلـي غـلـي
واللـي يقـول .. الإختـزال إبـداع .. ليتـه يستخيـر
جيت اختصر ( حمدان ابن مكتوم ) و أثـره مـا يلـي :
المرجلة / و الطيب / و الناموس / و السيـف الشطيـر
و طريق مجـدٍ .. مـا كسـاه إلا .. البسـاط المخملـي
و قصايده فيها / عذوبـة قيـس / مـع طنخـة جريـر
و إن قالها زئير أسـد .. مـا هـو .. صفيـر البلبلـي
و أصبح أبـوّه / لليتـم / و أصبـح عيـون ٍ للضريـر
و بشرى الفرج .. للمستجير .. المستضيـق .. المبتلـي
يا شيخ / يا نسل الشيـوخ / وصوفـك البحـر الغزيـر
و أنا افتخر في مدحتك .. و أنا اشهد .. إن الفخـر لـي
* أن جيت / ما ألوم العرب / لو ذبحـة : ميـة بعيـر
و غيرك خسارة فيه .. لو يذبح على شانـه .. طلـي *
قصيدتي ماكر حـرار .. اهدهـا لـك طيـر .. طيـر
في خايعٍ / مـا قـد رعـاه مـن الجمـال / إلا جملـي
و ابنيها بنيـان .. الحجـر .. وافلهـا فـل .. الحريـر
و اخطـط لمضمونـهـا / تخطيـطـي / لمستقبـلـي
و شلون ما سوي كذا . !؟ و اداحم الجمـع الغفيـر . !؟
و انت الشلي .. ابن الشلي .. ابن الشلي .. ابـن الشلـي
و قصـيـدة ٍ كتبتـهـا للكبـيـر ابـــن الكـبـيـر
اصدق قصيـد الشاعـر * محمـد جـارالله السهلـي *





. ( . فزاع . ) .









* .














حمدان حبْ لي راس ابوي ان جيتـه
وقله : لا يحمل هم .. مـن زلّوبـي
الطيـب يكفـي ... مـده ومديـتـه
واني على دربه .. مشيـت دروبـي
ولا يهـمّـه صـاحـب ٍ عديـتـه
في ما مضى اقرب علّي مـن ثوبـي
فـالمرجله والطيـب ذايـع صيتـه
ما اقـدر اذمّـه واكسبـه فـذنوبـي
لو حلفونـي حلـف .. مـا ذميتـه
لاقـول والله ضامنـه فـجيوبـي !!
والمشكلـه علـى البـشـر بديـتـه
وفـاللازمه صد وترك ماجوبـي ؟؟
على آخر ايامـه تـردّى .. ليتـه :
حشّـم بقايـا عمّـره المحسـوبـي
يـا كبـرهـا بحـقـه اذا مريـتـه
بيشوف تقصيره معـي عذروبـي ؟!
علـى العمـوم الاخ ( ذا ) شلّيـتـه
من بالـي ويانفـس عنّـه توبـي !
حمـدان راس ابــوي لا حبيـتـه
خلّـك اوّزانـه .. سمّعـه مكتوبـي
قله : محمـد قـال : فآخـر بيتـه :
(( لا يستضيق وربعنـا هلّوبـي ))
يـا كـم وفـي ٍ بالوفـا جازيـتـه
بنفس الوفا جازاك .. فـي مطلوبـي
وقلـه محمـد مثـل مـا وصّيـتـه
على يدك .. واسلوبي هـو اسلوبـي
وان الشعر يبطي وانا مـا اخطيتـه
هزله عدوّي و اجزلـه محبوبـي !!
وانـه طرالـي ذا المسـا واهديتـه
بيتين صاروا .. ( مشرقي وغروبي )
لو كـل شخـص اصادفـه خاويتـه
ما كان لا جيت العـرب فزّوبـي !!
ولوكـل مايطـري علـي سويـتـه
غطا على طيبـي كثيـر عيوبـي !!
واسلم وسلـم لـي عليـه ان جيتـه
والله يجازي كل .. مـن زلّوبـي ..





. ( . حمدان . ) .








* .














بـالرغم : من كثـر زلاّتـه وغلطاتـه !
ياطـول بالـي عليـه وياوسـع صـدري
وإن هبّ شعري علـى كـل إتجاهاتـه ؟
ماكنّ فوقي سمـا ولاّ الثـرى حـدري ؟!
أتخيّلـه ساكـت .؟ ويحكـي معانـاتـه !
وإن قلت: وشلون صارت؟ قلت لك مدري !
عيونه تسولف !! وتشـرح لـي سكاتـه ؟
وياحيّ رقة سوالـف رمشـه الخـدري !؟
بس علّمه كـان مـا راجـع حساباتـه ؟؟
تراي حاسب حساب الدمع مـن بـدري !!
خيانة أحبابـي ، و وقتـي ، وطعناتـه !
لـو نزّلـت دمعتـي مانقصّـت قـدري ؟
ولا صار ناوي علـى فراقـي وحياتـه ؟
ما عاد تلمح عيونـي وجهـه البـدري !!
انـا ؟ عرفـت الولـه مـن قـلّ جياتـه
وجايز يعرف الوفا لا حسّ في غـدري ..






. ( . خيانة أحبابي . ) .









* .














البـارحـه .. مــا بـيـن هـمـي و الأوراق . !
جـرّ القلـم طــارووق .. حـزنـن يسلـيـه . !
و أسترسلـت أبيـات شعـري .. مـن أعمـاق . !
الموقـف اللـي مـرّ .. و أزريــت أعـديـه . !
موعـد لقـا .. مبنـي علـى نيـة .. أفــراق . !
كان الأخيـر .. و ضيـق الصـدر .. طاريـه . !
و لا هي غريبـه لـو أقـول : الصـدر ضـاق . !
لكـن الأغـرب .. كيـف .. مـا ودعـه فيـه . !؟
كانـت دموعـه تختنـق بـيـن .. الأحــداق . !
و نظـرات عينـي .. تقتلـه .. ثـم .. تحـيـه . !
كنـي جلسـت أعلمـه .. كيـف .. يشـتـاق . !؟
و كنـه يعلـم شعـري .. شلـون .. يرثـيـه . !؟
شـح الزمـن .. بموادعـه .. و المسـا سـاق . !
حـزن القصايـد .. و العتـب .. و المشـاريـه . !
يـا ليـل .. و الله مـا ورى .. ليلـك أشـراق . !
النـور .. عانـه يسحبـه .. فــي خطـاويـه . !
عشاق .. قلي : ويش . !؟ أو .. ليش . !؟ عشاق . !
ألا .. ضحايـا وقــت .. مــدري شسمـيـه . !
يقطع .. سنيـن العشـق .. يـا درب الأشـواق . !
ياليـت .. بيـدي شـي .. و أقــدر أسـويـه . !





. ( . موعد لقا . ) .










* .















أغنـي الطـاروق واسمـي
واعوذ بالرحمن من همـي
واضحك واقول الله يسامحهم
وامدح ولوّ تمـادوا بذمـي
المشكله وش دخـل العالـم
لو تشكي عروقي ثقل دمـي
مليـت اجنبهـم ولامـلـوا
لين اختلط كيفي على كمـي
يا (مفرح بن طبير) يامفرح
ياصاحبي واقرب بني عمي
علمهم ان شحت مواردهـم
وردّت قاصيهم على جمـي
ماني بذاخر دونهـم حاجـه
لا لدت ((عويناتهم )) يمـي
وسلم على اللي في محبتهـا
حبيت كسري لو زعل ضمي
يالبا قلب الجـادل الطرقـا
شف غمها ماشابـه لغمـي
ومن عينها سالت قبل عيني
الدمعه اللي في طرف كمـي






. ( . الجادل الطرقا . ) .







* .

















تدور الأرض وتدور السوالـف والسنيـن تـدور
وأنا لو أعرف اللي راح مانـي بعـرف الباقـي
يقولون القصيد شعور والشاعـر بـدون شعـور
وأقـول الله يعاقبنـي اذا ماهـو مـن أعماقـي
انا لو أكذب بشعري وقف نبض ويبس حنجـور
وقادر أخسر الدنيـا وعاجـز أخسـر أخلاقـي
ولأجل عنق المها والصوت الأدفى والعيون الحور
وقف عمري ولاادري ويش انا من وقفتـه لاقـي
قسم بالله .. ما قبلك غياب ولا بعـدك حضـور
ولكـن ودي بفرقـاك .. لـو مـا ودك فراقـي
تعاتبنا بمـا فيـه الكفايـه مـن ثمـان شهـور
وسالت دمعتين وطـاح قلـب وماتـت أشواقـي
تعدتـك المشاريـه وجفـاك اللـوم والمستـور
إذا ما يكشفه صوتـي كشفـه الحبـر بأوراقـي
تعبت أضحك على نفسي وأبرر لك وأعيش الدور
وتعبت أجامل ظروفك وأصـدّق كذبـك الراقـي
يكفّيني أغيـب وخافقـي ماجـاك منـه قصـور
ويكفّيـك اتّذكّـر كـل ليلـة لهـفـة عنـاقـي
تذكّر يـوم أخليـك اتباهـى كبريـاء وغـرور
يـوم انـي اتحدابـك وأخيـب هقـوة الهاقـي
وتذكّر يوم أعذرك وانت لا صـادق ولا معـذور
أدورلـك عـذر وأصدقـه وأكـذّب أحـداقـي
وتذكّر يوم جيت من الحزن متضايـق ومكسـور
فرشت لك الضلوع وقلت لك يـا سيـد عشاقـي
خذ اضلوعي وابن فيها يسار الصدر بيت وسور
ترى مافيه قبلك مـن سكـن صـدري وخفاقـي
وبعد هذا رحلت ولا بقـى إلا بيتـك المهجـور
وألا ياكبرهـا لا مـن رحلـت ومنزلـك باقـي





. ( . عنق المها . ) .










* .

















يضيـق صـدري كـل مـا هبـت علـي مـن الجنـوب
نسـايـمٍ مامـلـت طـعـونـي وقـلـبـي مـلّـهـا..
وارقـى علـى مرقـاب حزنـي واتـحـرى للـغـروب
وامـسـك جـدايـل هالحـيـاه المـدبـره وافـلّـهـا..
واشـوف وشلـون الليـال ادور فـي الوقـت اللـعـوب
واجمـع مسائـل هالبشـر فـي دفـتـري واحلّـهـا ..
والعن ابو الحـظ الـردي !! واستغفـر المولـى واتـوب
وآقـول يـا ربـي تعيـن اللـي صبـر ثـم شلّـهـا ..
ويا سعود قـرب لـي مـدام الوقـت والعمـر محسـوب
واسمع يـا خـوك ابيـات مـن جوفـي نويـت اتلّهـا ..
لا صارت الدعوه مابين : ( ضلوع صدري ) و(الهبوب ) !
بقولهـا و : (( اللـي عقـد روووس الحبـال يحلّهـا ))
وش عاد نرجي من زمـن صـارت بـه كبـار الذنـوب
انـك علـى الباطـل سيـوف الحـق تونـي سلّـهـا !!
اسلامك اصبح (( متهـم ! )) والنـور غيّـب ومحجـوب
دروووبهـم يـا كثرهـاا ؟؟ وادروبنـا يــا قلّـهـا !!
خويّنـا تـصـلاه نــار الكـفـر ونشـوفـه يــذوب
وحنّا نترجى من (( عجوز الغـرب )) ترهـي ظلّهـا !!
لا عادبـه فزعـه ولا غـيـره ؟! وحيلتـنـا يــا دوب
( نشجـب ونستنكـر ) عساهـا تنسـمـع او علّـهـا ..
صـار التنافـس بالطـرب مـن اولويـات الشـعـوب !
(( الغانـيـه صفقلـهـا ؟؟ والراقـصـه طبلّـهـا !! ))
والموضـه تحاصـر تقاليـد العـرب مـن كـل صـوب
تـفـوح دلتـنـا زعــل واعـوانـهـم تـزلّـهـا ..
والكـل منّـا يـشـوف نفـسـه للتـخـاذل مغـصـوب
احلوقنـا مـاتـت عـطـش ! يالله طلبـتـك بلّـهـا ..
يالله ستـرك مـن علـومٍ فــي خواطـرنـا تـجـوب
رحمـاك سهلـهـا عليـنـا دقـهـا مــعٌ جلّـهـا ..
ويا سعود اخذها من نمط (حكـيٍ علـى لسـان القلـوب)
اربـع نصايـح لحيـاتـك يــا عـسـى توصلّـهـا ..
المرجلـه هـي ( البلـد ) وافعـال يمنـاك ( الـدروب )
والادمـي يـولـد ( غـريـب ) ولاتسـنّـع دلّـهـا ..
والكايـده تبغـى ولــد مـاهـوب طـمـاع وكــذوب
والـرابـح الـلـي نفـسـه لـربـه قــدر يذلّـهـا ..
وتـرى الكـرم عنـد العـرب يغطـي آلاف العـيـوب
وانـك بخيـل تسـاوي عيـوب العـرب ذي كلّـهـا ..
واحذر تحسب ان كل بير ابدنيتـك بـه ( مـا ) شـروب
واذا تجاهـلـت الـعــواذل ابـتـمـوت بغـلّـهـا ..
وانــا بــوّدع راس مرقـابـي اذا حــل الـغـروب
وبقـول يـا ربـي تعيـن اللـي صبـر ثـم شلّهـااااا !!






. ( . يا ســعود . ) .










* .
















بعد طول البطا جات العيوف الكايـده تختـال
تهادى من ورى حدب الضلوع العوج مختالـه
طويلـة قـد ممشوقـه قـوام وعودهـا ميّـال
عريبة جـد ّ عليهـا الجمـال مطـول ٍ بالـه
عنود مذيّرة فيها حيـا عـذرا وفيهـا جفـال
ولها حـق اتمـادى فـي وعدهـا واتحرالـه
تواعدني لها مدة علـى مطلـع شهـر شـوال
تقول انهـا تبشرنـي بعيـد الفطـر وهلالـه
وجات خلافهـا معنـى ثقيـل ودونهـا مـوال
وعينـي ترقـب اخطاهـا ومعناهـا وموالـه
تقول امدح .. واقول المدح يبغى له رجال افعال
يطيب المدح من طيب الفعل لا طابت رجالـه
انا مانيب من يمدح يبي خوة وعطـف ومـال
انا امدح من ملكني بمعروفـه وامـدح افعالـه
ولامن عودت مدح وفخر وجزال عقب جـزال
تمثنيت الفخر وارهيت شعر وجيـت بجزالـه
انا وشلون ما اغني وافاخـر وامـدح الجـلال
وهم يمناي لا حـان اللـزوم وكبـرت القالـه
بني عمي عصابة راسي المطنـوخ والاقـوال
تثبتها .. فعول اهـل الوفـا والعـز والطالـه
مدايحهم قبل مدحي على روس الطوال طـوال
يقولون ويطولـون ونباهـم مـا حـد ٍ طالـه
اماري فيهم الدنيا وصيت الطيـب راس المـال
صدق من قال نعمه غير صيت الطيب زوّالـه
يميل الوقت وتشين الظروف ويكبـر الاشكـال
ويبلانـي زمانـي واتحيـزم واتهـيـى لــه
اشيل الحمل فوق الحمل وليا شفت حملي مـال
تحديت الحمول بفزعة اللـي تصـدق اقوالـه
اسندها على ناصر وناصر مـا عليـه جـدال
يا كم حمل ٍ عجز عنه سواه وناصـر اشتالـه
ابو متعب وتاقف لـه بيوتـي وقفـة الاجـلال
سلام الله على اللي عدني واحـد مـن عيالـه
طويل الباع محمود السجايـا نافـل الاجيـال
صفاته من غلاه وطيب ذاتـه شـرد وجلالـه
لو ان الله خلق مثله على الدنيا ثـلاث رجـال
قسم بالله ما تلقى رجـل يشكـي مـن احوالـه
يقولون المراجل كسب يمنى .. يا عريب الخال
وانا اقول المراجل .. رجل .. فعلك عمه وخاله
تعدي يا الهنوف وشيلي البرقع وذبـي الشـال
انا لا غاب وجهك عن عيوني حالتـي حالـه
تعلّـي للسمـا واسترسلـي بالمـازن الهمـال
ترى لازال باقي للفخر فـي صـدري رسالـه
يا كم مره يوردنـي زمانـي للضمـا والـلال
وتارد هقوتي رجل معـروف وتقصـر حبالـه
وبعد ربـي اورد حاجتـي للهاتـف الجـوال
وادورلـي اسـم فـارق وادور رقـم جوالـه
واوردها على مجحم ومجحم مضرب الامثـال
ثلاث ارباع خلق الله لحـال ومجحـم لحالـه
عريب الساس من دون الجماعه ينطح العيـال
قوي البـاس لامنـه ضـرب ضربتـه قتالـه
ليا حمي ّ الوطيس وزاغت الاذهان حط وشال
تعزوى به زحازيح الرياجيـل وتعـزوى لـه
كأن الله خلق مجحـم عشـان يحقـق الآمـال
يا كم واحـد تأمـل بالمحـال وحقـق آمالـه
خذا من صلب جده فزعـة الرجـال للرجـال
وخذا من خاله الكف الندي واسترخص اموالـه
كريم ٍ كم بـذل للخيـر بالافعـال و الامـوال
عساها في موازينه وتشفـع لـه وتبقـى لـه
وذي شيخة قصيد المدح سبك وحبك واسترسال
وزبدتها وهـي فـي مدحـة الجـلال مختالـه
انا ما نيب من يمدح يبي خوه وعطـف ومـال
انا امدح من ملكني بمعروفـه وامـدح افعالـه







. ( . شيلي البرقع . ) .









* .













المجتمـع : مواصلـة الأفــراد
مسيرة استكشاف غير .. الغير !!
متجانس ومبني علـى الأضـداد
متكـامـل وتكامـلـه تقصـيـر
تحـرّره .. يستلـزم : استعبـاد
وتديّنـه .. يحـتّـم : التكفـيـر
واللي يشوفه مـن ثـلاث أبعـاد
بيدري إن الشر نصفـه خيـر !!
وأنا رغم حزني علـى استعـداد
اضحك وأجامل .. جرحي الأخيـر
يا السيّد اللي مـا عليـك أسيـاد
يا الوافر الضاري على التوفير !!
وش يفرق الشاعر عن القصّـاد؟
الفرق فـي ( طريقـة التفكيـر )
هـذا يقـول : الـدارج المعتـاد
وهـذا يمـارس: لـذة التغييـر
تـرى الاوادم ظــل للأجـسـاد
لـو تنسلـب حريـة التعبيـر !!
وشـرواي لا يخضـع ولا ينقـاد
بقولها واللي يصيـر .. يصيـر
شهرتك ما هي في ورع وجهـاد
مشهور لكن ما اشتهـرت بخيـر
همومـك أمّـا شــرب ولاّ زاد
وهمومي اكبر مـن كـذا بكثيـر
كنت احسبن كل السيـوف حـداد
واثر بعضها زينـه وتصويـر !!
مشكلتك أقدم من ( ثمود وعـاد )
ودي اسميها باسمهـا .. ميـر :
لك فالدجاج أكثر مـن استشهـاد
طيور لكن مـا تعـرف تطيـر !!
يا السيّد أنصت للحديـث الجـاد
البِـر مـا يحـتـاج للتبـريـر
واللـي مميزنـا بحـرف الضـاد
مـا للعقـل قيمـه بـلا تدبيـر
وإن قلت لي : الأحفاد والأجـداد
بقول لك : عذرا ً علـى التأخيـر
وإن قلت لي : التاريخ والأمجـاد
بقول لك : مع وافـر التقديـر :
اصـدق إن عنتـر ولـد شـداد
لكن اشك الزير سالم .. زيـر !!







. ( . الى السيد مع وقف التبجيل . ) .








* .













خاوا جروحه وخلاهـا علـى ربّـه
ذي آخر أخبار ( قلبي ) يا مشاويري
كله ذهول !! وهبـوب الغبنـه تهبّـه
مغبون .. وعتابه اصدق من معاذيري
القلب: ( مركب سهر ) والريح تلعبّـه
والموج ما يرحم ذنوبـي وتقصيـري
والحب : غبّه ورى غبّه ورى غبّـه
فقدت فيها ثـلاث اربـاع تفكيـري !
مرات اقول الخطا مني وانـا السبّـه
ومرات اقول السبب قسـوة مقاديـري
واااعيني اللي تهـل الدمـع وتصبّـه
على فراق ٍ سرق فرحـة تباشيـري
تقول سامح زمانـك والحـزن خبّـه
واقول منهو يعوضنـي مخاسيـري ؟
وشلون اسامح زماني واللـي آحبّـه
خذاه غيري وانا اولى فيه من غيري !







. ( . خذاهـ غيري . ) .



* .










ما يملي عيون الرجال من الرجـال الاّ الزحـول
أبصم عليهـا بالعشـر .. عـن اقتنـاع وتجربـه
واصدق احاديث الزمـان تقولـه كبـار الفعـول
ما هو حديـث الألسنـه لـو وثّقتـه المكتبـه !!
والمدح لا من قيل في رجـل ٍ يقـول ولا يطـول
كنّـه : مسبّـه ابطريقـه راقـيـه ومهـذبـه !!
والقلب ضحكة صبح مترامي وبالحـزن مغسـول
تجمّع الأضـداد فـي صـورة جمـال مرتبـه !!
والشعر (فارس حلم) والفكـره (حياويّـه بتـول)
وانا الـذي يرسـم تفاصيـل (الزفـاف) ويكتبـه
ما جيت اروّج للهزل واحاور كفـوف الخبـول !
من باب كسب اعجاب ساذج من سذاجة معجبه !!
ولا جيت اقول ان التكبّر شرط تبريـر الوصـول
دام الوصول احيان ما يحتـاج شعـر وموهبـه !!
لا والله الا جيت ابنشـر فكـر واخاطـب عقـول
لو اكثر اكثرهم ( نمـط تواجـدي ) مـا يعجبـه
يكفينـي اعجابـي بذاتـي روح وافكـار وميـول
وتفاخري لامن لقيت ان ( بيني وبينـي ) شبـه !!
ماني بنافس غير أنا !! واحساس في صدري يجول
احيان اقوله واكتبـه واحيـان يكفّـي اشطبـه !!
والبارحه مثل السنه .. تجارب ووقـت وفصـول
عطت ضميري من دروس الوقـت مالـم يطلبـه
زلة خوي ّ .. وطعنة صحيب .. وتشمّت من عذول
ياااكبرها فـي حـق مـن يفخـر بفعلـه وشنبـه
تطلّـع الرجّـال مـن طـوره وتدخلـه الذهـول
مابين يصدّق ما حصل !! أو ما حصل يكذّبـه !!
لا بارك الله في النوايا البيض لاصارت تحـول :
من دون عرفك صـدق نيّـة صاحبـك ومذهبـه
لكّن .. دامك محترف يا صاحبـي دق الطبـول !
حاول تلاقي لك مكان بخلـف ظهـر المطربـه !!
ما عاد لك عنـدي .. مقـام ولا مـلام ولا قبـول
وجّه على حظك (ركايـب لـوم نفسـك) واندبـه
ويا صوتي المبحوح .. ساعدني آباغني واقـول :
شي ٍ وقف لي اسهلـه ! قـدّام افكـر باصعبـه !
الحب .. هبّل في عقل قيس وترك قيـس مهبـول
وانا على حده سبـب مـن مـر قلبـي وسلبـه :
الفارع اللي كنها مختاره من الطول .. طـول . !!
يلبق على رزة جسدها لا تحرك ( موّكبـه ) . !!
اليا مشت تنتابك الحيره .. ويذْبحـك الفضـول :
كن بعضهـا ماهـوب وياهـا وكنهـا تسحبـه !!
لبّا غنجها .. والكلام الذرب .. والطرف الخجـول
اللـي اليـا سلهـم عرفـت ان المنيّـه بسبـبـه
وانا ( نحيل شعور ) لو ماكان في جسمي نحـول
وآخـاف يغلبنـي غـرام عيونهـا ولا اغلـبـه
والموت .. ماهو من خسارة خافق الغروّ الجفـول
الموت .. لامني دريت ان غيري يقـدر يكسبـه !






. ( . الموكب . ) .

[هواي الملتاع]

اتمنى ان اكون وفقت في الكتابه
عن هذا الشاعر.

دمتم جميعاً بألف خير

[جنـون الصمــــت]

بـدت علاقتنـا مـن ايـام الغـزو والاحتـلال
يعني هو : أول حب واول تجربـة واول رفيـق
اجامل احيانـاْ لكـن اليـا اشغلونـي بالجـدال
ابـلا تـردد اتمـادى عشـق واولـع حـريـق


مشكور اخوي الملتاع صراحه في اشعار اول مره اقراءها واطلع عليها

دمت

//

[هواي الملتاع]

جنون الصمت

العفو يا اختي
شرفني تواجدك في متصفحي
شكراً لتواجدك
دمتي بخير

[ترف..!]

مبدع داهية الشعر

صح لسانه مدد بلا عدد ودام نبضه

تسلم أخوي ع الذائقه الرائعه

تقديري

[سمو الامير]

شاعر جميل وصح لسانه ...

تسلم الآيادي على النقلة الحلوة .,’

[هواي الملتاع]

مبدع داهية الشعر

صح لسانه مدد بلا عدد ودام نبضه

تسلم أخوي ع الذائقه الرائعه

تقديري

الله يسلمك
شكراً لتواجدك
دمتِ بخير

[هواي الملتاع]

شاعر جميل وصح لسانه ...

تسلم الآيادي على النقلة الحلوة .,’

الله يسلمك
اشكرك على مرورك
دمت بخير

[ضوى الليل]

تسلم يمناك هواى على النبذه المميز لشاعر مميز كا السهلى

ماقصرت يالغالي وعساك على القوه دوم يارب



تحيتي وتقديري لك



//

[سلطانة الغيد]

محمد جار الله شاعر غني التعريف ..!!

فقد اثبت وجوده في فتره قصيره ونجح في جذب قلوب المتذوقين لـ ترقب جديده ..!!

فـ لله درك يا ابو جار الله ..!!

//

هواي الملتاع ..!!

دائماً تتحفنا بـ جديدك الرائع ..!!
يعطيك العافيه يارب ..!!
بـ نتظار جديدك .. بـ شوووق ..!!
تقبل ودي .. و.. عبير وردي

[هواي الملتاع]

تسلم يمناك هواى على النبذه المميز لشاعر مميز كا السهلى

ماقصرت يالغالي وعساك على القوه دوم يارب



تحيتي وتقديري لك



//

الله يسلمك
تشرفت بتواجدك هنا
شكراً لمرورك
دمتِ بخير

[هواي الملتاع]

محمد جار الله شاعر غني التعريف ..!!

فقد اثبت وجوده في فتره قصيره ونجح في جذب قلوب المتذوقين لـ ترقب جديده ..!!

فـ لله درك يا ابو جار الله ..!!

//

هواي الملتاع ..!!

دائماً تتحفنا بـ جديدك الرائع ..!!
يعطيك العافيه يارب ..!!
بـ نتظار جديدك .. بـ شوووق ..!!
تقبل ودي .. و.. عبير وردي

الله يعافيك
الرائع تواجك هنا
شكراً لمرورك يا اختي
دمتِ بخير