طفولة تأكل عمر الشباب ليصل الشباب الى المشيب .. حكاية أب وصل الى مشيب العمر امام جبل

[فيصل بن ضيدان]

بسم الله الرحمن الرحيم
السلام عليكم ورحمة الله وبركاته
ياعيال مدري منين هالردى جاكم؟!

طفولة تأكل عمر الشباب ليصل الشباب الى المشيب .. حكاية أب وصل الى مشيب العمر امام جبل تضحياته العضيمه .. وماله الذي انقضى .. وعمره الذي انقضى .. يقف الأبناء في موقف .. العقوق .. التنكر .. الجحود .. فكانت هذه البكائية التي تقطر أسى :-


قال الذي يقرأ بليا مكاتيب ياللي تلومون العمى من عناكم
يا عيال ياللي تشرفون المراقيب تريثوا لي واقصروا من خطاكم
خوذوا كلام العود ما به تكاذيب مثل السند مظموم للي وراكم
يا عيال لا صرتوا ضيوف او معازيب ترى الكلام الزين ملحة قراكم
ترى النمامه من كبار العذاريب وهرج البلايس ما يطول لحاكم
المذهب المذهب ترى المذهب الطيب ترى ردا المذهب يبور نساكم
يا عيال ما سرحتكم باللواهيب يا عيال ماعمر المغرب ولاكم
يا عيال ما عذبتكم بالمشاعيب ولا سمعوا الجيران لجة بكاكم
يا ما توليت الخلايق تقل ذيب من خوفتي يقصر عليكم عشاكم
احميت رجليني بحامي اللواهيب وخليت لحم الريم يخالط عشاكم
واليوم هذي لحيتي كلها شيب وهذا مكان توضيعي في ذراكم
يا عيال بعتوني بصفر العراقيب ما هي حقوقي سود الله قراكم
قمت اتوكا فوق عوج المصاليب وقصرت خطاي يوم طالت خطاكم
يا عيال من حقي عليكم مطاليب عطوني القرضه جزاء ما وتاكم
المنسب الطيب على المنسب الطيب المنسب الطيب يزكي خفاكم
خوالكم بالطيب تروي المغاليب يا عيال مدري هالرداء منين جاكم
يا علكم في حاميات اللواهيب يا للي على الوالد كثيرٍ لغاكم
قصيتكم واسميت وادي سلاحيب لقيت بالصبخاء مدافيق ماكم
الناس تدري بالردى والمعاييب لا قبل حديكم قيل جاكم بلاكم
ما ني بفاضحكم بوسط الاجانيب بفاعلكم يدرون كل اقرباكم
وش علمكم يا تاركين المواجيب لو تتبعون الجد محدٍ شناكم
شفت الجفاء والحيف والغلب والريب اهبوا هبيتوا بدد الله نماكم
عسى نساكم ما تولد ولا تجيب تغيب شمس الصبح ويظلم سماكم
صيور ماهو عاويِن بيننا الذيب وبالقبر ما اسمع طيبكم من رداكم

مع تحياتي لكم ***الضابط*** / فيصل بن ضيدان